Napiling team captains sila si Mark Barroca sa Magnolia Hotshots ug Japeth Aguilar sa Barangay Ginebra Gin Kings sa ilang tagsa-tagsa ka team sa 2024 Philippine Basketball Association (PBA) All-Star Game nga ipahigayon sa Bacolod City karong Marso.
Magpulihay sa pagpili og mga magduduwa sila si Barroca ug Aguilar aron ilang ikauban sa kalihukan.
Si Barroca, kinsa maoy nakahakot sa labing daghang mga boto, napiling All-Star team captain sa labing unang higayon sukad nga gigamit kining maong format sa miaging tuig.
Sa iyang bahin, si Aguilar napiling team captain sa ikaduhang sunodsunod nga higayon. Naagak niya ang iyang team ngadto sa kadaugan batok sa puwersa ni Ginebra guard Scottie Thompson, 140-136, sa miaging tuig sa Iloilo City.
Adunay 27 ka mga magduduwa nga gipili sab sa fans, host city, coaches ug media pinaagi sa botasyon ang piliunon nila ni Barroca ug Aguilar aron mahimo’ng mga kauban.
Gipangtumbok mao sila si Thompson, Christian Standhardinger, Jamie Malonzo, Maverick Ahanmisi, Nards Pinto, ug Stanley Pringle sa Ginebra, June Mar Fajardo, CJ Perez, Marcio Lassiter, ug Terrence Romeo sa San Miguel, Calvin Abueva, Paul Lee, Jio Jalalon, ug Ian Sangalang sa Magnolia.
Naa sab sila si Calvin Oftana ug Jayson Castro sa TNT Tropang Giga, Chris Newsome sa Meralco Bolts, Arvin Tolentino sa NorthPort Batang Pier, Robert Bolick sa NLEX Road Warriors, Ricci Rivero sa Phoenix Super LPG Fuel Masters, Juami Tiongson sa Terrafirma Dyip ug Gabe Norwood sa Rain or Shine Elasto Painters.
Ang nangahisgutan gipangpili sa fans samtang si James Yap sa Blackwater Bossing gipili sa host city samtang sila si Jason Perkins ug Tyler Tio sa Phoenix, Don Trollano sa San Miguel, ug Cliff Hodge sa Meralco gipangpili sa coaches ug media.
Sa laing bahin, sila si Ginebra coach Tim Cone ug San Miguel Beermen coach Jorge Gallent ang mogiya sa duha ka All-Star teams.