Basak San Nicolas modelo sa solid waste management

Usa sa mga dakong hagit sa Si­yudad sa Sugbo mao ang nag­kadaghan nga mga basura.

Gani, usa sa gibasol nga mga hinungdan sa baha mao ang nagtipun-og nga mga basura sa mga agianan sa tubig. Nagma­tuod niini mao ang gatusan ka mga tonelada sa mga basura nga mahipos matag clean up drive sa Cebu City Government.

Apan niay usa ka barangay sa dakbayan sa Sugbo nga angay sundon sa uban kay maayo kaayo ang pagdumala sa solid waste. Kini mao ang Brgy. Basak San Nicolas, gigikanan nga dapit mismo ni Mayor Michael Rama.

Bisan dili pa dugay ang pagdumala ni Norman A. Navarro sa Basak San Nicolas isip barangay kapitan, siya ang nag-una sa mga proyekto sa solid waste management pinaagi sa iyang “Gubat sa Basura.”

“Ang atong barangay ang napili nga model barangay sa solid waste management,” matod ni Navarro atol sa interbyo sa Superbalita Cebu.

Matod ni Navarro, gipili ni Rama ang iyang liderato isip chairman sa Solid Waste Ma­nagement sa 16-ka mga coastal barangay sa siyudad sa Sugbo.

Isip first councilor, nahimong kapitan si Navarro niadtong 2015 human namatay si anhing barangay kapitan George Rama sa sakit nga pneumonia.

Usa siya sa mga founder sa Lumad Basakanon.

‘TUGKARAN TA, LIMPYUHAN TA’

Gumikan sa adbokasiya nga ‘Gubat sa Baha,’ namugna ang kalihukan nga ‘Tugkaran Ta, Limpyuhan Ta’ nga nag-awhag sa mga lumolupyo sa barangay sa pagsalmot sa mga kalihukan sa pagpanglimpyo aron malikayan ang baha.

Naay kaugalingon nga committee on solid waste management ang barangay.

Hugot ang pagpatuman sa kalimpyo sa matag tugkaran pinaagi sa pagkolekta sa mga basura ug mga kalihukan sama sa coastal clean-up.

Niadtong Septiyembre 16, 2023, 2,000 ka mga residente ningboluntaryo pagpang­limpyo sa coastal area ug inter­ior nga mga sityo.

Ang duha ka oras nga kalihukan, nakakolekta og 19-ka tonelada nga basura.

Duna silay upat ka mga dumptruck ug 19 ka garbage collectors alang sa kada adlaw nga paghakot.

Gi-monitor usab ang ilang drainage system sa laing 17-ka mga worker, diin halos 20-ka sako ang makuha matag karon ug unya.

SERBISYO, PASILIDAD

Ang barangay dunay mga buhatan ug serbisyo.

Lupon-gitahasan sa pagdumala sa imprastraktura, solid waste management, peace and order, disaster management, education, health ug social services.

Ang komitiba sa disaster nang­hatag og tagduha ka fire extinguishers sa matag usa sa 42 ka mga sityo. Duna silay gipailawom sa fire safety training.

Ang ilang daycare center airconditioned, dunay pasilidad sa hygiene ug playground.

Naggahin usab og P1 million kada tuig sa street lighting, dunay P3,000 nga burial assistance, libre nga mga tambal sa duha ka health centers.

Naa sa phase 1 ang ilang P30 milyunes nga edipisyo alang sa Community-Based Drug Rehabilitation Program (CBDRP) nga giabagan sa admi­nistrasyong Rama.

Nagplano siya sa pagtukod og tulo ka andana nga multi-purpose hall nga gahinan og P25 milyunes ni Cebu City south district Rep. Edu Rama.

Si Navarro mapasigarbuhon ug mapasalamaton nga gipili silang tanan sa iyang slate sa bag-ohay lang natapos nga Barangay and Sangguniang Kabataan Elections (BSKE).

“Nalipay ko kay akong gi­hang­yo sa mga tawo during kam­panya nga straight lang jud nga 16-zero, so, ilaha gyud giha­tag namo,” matod ni Navarro.