HUMAN sa pipila ka tuig nga reklamo gi-padlock niadtong buntag sa Miyerkules, Hunyo 18, 2025, ang Basketball Gym sa Casals Village sa Barangay Mabolo, Dakbayan sa Sugbo.
Si Wayne Sinas, ang hepe sa Prevention Restoration Order Beautification Enhancement (Probe) maoy nangulo sa pagpatuman sa closure and cessations order nga giisyu ni Mayor Raymond Alvin Garcia nga gipetsahan og Hunyo 2, 2025.
Uban sa personnel sa Probe ang mga sakop sa Mabolo Police Station sa pagsira.
Si Sinas nipabutang og kandado sa duha ka “ring” sa maong basketball court.
Si Sinas nga nahinabi sa Sunstar Superbalita Cebu niingon nga ang pagkandado nila sa gym pinasubay sa taas nga due process.
Nasuta nga walay business permit ang Casals Village Home-owners Association (CVHA) nga nagpaabang sa maong basketball court ug ang luna gipanag-iya sa kagamhanan sa Dakbayan sa Sugbo.
Hinuon malinawon ra ang pagpadlak sa Probe sa ring diin way nibabag. Wala na sab mohatag og komentaryo ang Presidente sa (CVHA) nga gikuhaan sa iyang habig sa Sunstar Superbalita Cebu.
Nidugang si Sinas, nga makadaghan na gipadalhag show-cause order ang CVHA kabahin niini.
Sa nakuhang impormasyon sa Superbalita Cebu, nagpaabang ang association sa basketball court sa tag 500 pesos matag oras.
Mokita ang nagdumala sa gym og 6000 pesos matag adlaw, kapin sa P180,000 ang buwan, ug kapin sa P2 milyunes ang tuig.
Una niini si Eduardo Sy maoy nipadangat sa ilang reklamo tungod sa giingong abuso sa association, pagpaabang nga way business permit ug dili ilang propedad.
Gawas pa niini, giingong nakabalda sa mga residenti ang kasaba sa lugar sanglit gabii na kaayo duna pay magduwa og basketball.
Naabot na ang reklamo sa Department of Interior and Local Government (DILG) 7, ubang ahensiya, ug sa Cebu City Government. / GPL