GIMANDOAN na sa Department of the Interior and Local Government (DILG) si Davao City Vice Mayor Sebastian “Baste” Duterte nga molingkod isip acting mayor isip hulip sa iyang papa nga midaog sa miaging eleksyon sa Mayo, si kanhi Presidente Rodrigo Duterte (FPRRD), kinsa kasamtangang gitanggong sa Netherlands taliwala sa nagpadayon nga imbestigasyon sa International Criminal Court bahin sa giingong krimen batok sa katawhan sa nasud atol sa pagpatuman sa iyang drug war.
Sa usa ka pamahayag, giingon sa DILG nga gipadad-an nila og sulat ang bise mayor niadtong Hunyo 30, nga naghangyo kaniya sa paghimo sa mga katungdanan sa mayor sa Davao City aron malikayan ang pagkaparalisa sa operasyon sa gobyerno.
Gikutlo sa ahensya ang Section 46(a) sa Local Government Code, nga nag-ingon nga sa mga kaso sa temporaryo nga pagkawalay katakus, pisikal man o legal, ang bise mayor awtomatikong mohimo sa mga katungdanan ug mobuhat sa mga gahum sa mayor.
Subay sa mao gihapong han-ay sa panagsunod, gitudlo usab sa DILG ang top-ranking City Council Member Rodrigo Duterte II isip acting vice mayor.
“The DILG underscores that the action is both legal and necessary to ensure continuity of leadership in Davao City amid ongoing legal proceedings involving the former President before the International Criminal Court (ICC),” matud sa DILG. / TPM/SunStar Philippines