Midayag sa panan-aw ang mga basura nga nagtago sa ilawom human gipangguba ang mokabat sa 26 ka mga barung-barong nga nagbarog daplin sa dagat sa Sityo Naba, Alaska, Brgy. Mambaling, Dakbayan sa Sugbo.
Nagkanayon ang Cebu City Public Information Office (PIO) sa ilang Facebook post niadtong Miyerkules, Enero 22, 2025, nga ang maong kalambuan unang gibutyag atol sa tigom nianang pagkabuntag sa samang adlaw nga gipatawag ni Konsehal Jerry Guardo, pangulo sa Technical Infrastructure Committee.
Ang maong tigom gitambongan sa mga opisyal sa Barangay Mambaling ug mga representante sa mga hingtungdang buhatan sa Cebu City Hall.
Sa inpormasyon nga nahisgutan atol sa tigom, boluntaryong gibungkag sa Badjao community ang ilang pinuy-anan bugti sa P20,000 nga hinabang pinansyal nga ilang nadawat sa miaging semana.
"Tungod sa nagtipun-og nga mga basura sa ilawom sa mga barung-barong, kanunay nga mabahaan ang maong bahin sa Mambaling matag higayon nga adunay kusog nga pagbunok sa uwan," tipik sa mensahe sa Facebook post sa PIO.
Ang PIO nidugang nga ang maong demolisyon maghatag kanila og higayon nga makuha ang nagtipun-og nga basura sa lugar. Human sa tigom, nipahigayon og on-site inspection ang grupo nga gipangulohan ni Konsehal Guardo aron masuta ang mga rota sa mga ekipo nga gikinahanglan sa pagtangtang sa basura ubos sa pagdumala sa Department of Engineering and Public Works sa dakbayan. /JPS, PR