Kapin sa usa ka gatos ka mga plastic bag nga puno sa medical waste ang nagtapok sa storage area sa luyo nga bahin sa Mandaue City Hospital (MCH).
Ang uban niini wala makolekta sulod sa kapin sa usa ka tuig nga usa ka sitwasyon nga nakapabalaka sa mga opisyal sa siyudad atol sa inspeksyon niadtong Miyerkules, Hulyo 2, 2025.
Si Mandaue City Mayor Thadeo Jovito “Jonkie” Ouano nga personal nga nag-inspeksyon sa ospital, nagpadayag og kabalaka sa dugay nang isyu ug nimando og dinaliang pag-follow up sa waste management team sa siyudad ug sa service provider.
“Karon pa ko nakakita mismo sa basura sa ospital nga nasayran nato nga nagtapok dinhi og kapin sa usa ka tuig. Ang mas makapaalarma kay ang atong nakita karon gamay pa lang, ang kadaghanan sa basura naa sa North Bus Terminal,” matod ni Ouano.
Si Hospital administrator Ligaya Lakambini Dargantes niklaro nga ang problema dili sa operasyon sa ospital kondili sa kalangay sa paghakot sa gitahasan nga service provider.
“We have a Memorandum of Agreement (MOA) with that hauler, so the processing is already being handled by the City Environment and Natural Resources Office (Cenro).” matod ni Dargantes.
Dugang niya nga nahuman ang kasabutan sayo ning tuiga, apan wala pa magsugod ang operasyon sa hauler tungod sa pending regulatory licenses nga gikinahanglan para sa pagdala sa delikadong basura.
“We awarded the contract during the first quarter of the year, but the hauler is still securing specific permits. Without those, they’re not authorized to collect or transport infectious waste,” pasabot niya.
Ang basura nagtapok sa temporaryo nga holding facility sa luyo sa ospital, usa ka lugar nga gitagana lang para sa mubo nga panahon nga pagtipig.
Apan, tungod sa transisyon tali sa mga service provider ug sa pagkapaso sa miaging kontrata sayo ning tuiga, nagpadayon ang pagtapok sa basura.
Aron malikayan ang dugang kahuot, ang ubang basura gibalhin sa mga Cenro personnel sa ikaduhang storage site sa daang North Bus Terminal sa Barangay Subangdaku.
Matod ni Ouano nga ang kaduol sa terminal sa kasikbit nga residential areas nakahatag og dugang kabalaka sa panglawas ug kalikopan.
Gihatagan og gibug-aton ni Ouano nga ang pagsulbad sa isyu karon ang top priority sa iyang administrasyon.
Kini nga sitwasyon nagsalamin sa bag-ohay lang nga kaso sa Barangay Libjo, Tabogon diin ang mga medial waste gilabay sa daplin sa karsada niadtong Hunyo 24, 2025.
Matod ni Dargantes, ang mga sakto nga gibutangan sa infectious waste gibaatan ug hugot.
Regular sab ang ilang paghimo og disinfection aron masiguro ang kaluwasan sa mga hospital personnel ug sa mga tawo nga nagpuyo sa duol. / CAV