NANGANGKON ang usa ka basurero nga modako ang kita sa pagpamasura kon makasuyop og shabu.
Si Manuel Narra Ocañada, 49, alyas “Weder-Weder” , dunay kapuyo, taga Doña Christina Village, Barangay Guadalupe, Cebu City nakuhaan og duha ka putos nga shabu human nadakpan alas 9:30 sa gabii Lunes, Marso 24, 2025.
Gitanggong siya sa Guadalupe Police Station human sa iyang pagkasikop.
Si Ocañada nibutyag nga siya maluya kon dili makasu-yop og shabu. Sa usa ka adlaw makasuyop siyag tag duha ka putos nga mobalor og P400.
“Condition kaayo ko mama-sura makatulo gyud ka patimbang sa mga scrap metals dakong kita” dugang ni Ocañada.
Iyang naobserbahan nga kon makasuyop, modoble ang iyang kita tungod kay gana man kaayo siyang mamasura ug dili na sab siya makabatyag sa baho sa basura.
“Kining akong pagsuyop sa shabu panginabuhi ni! Akong gigamit sa maayong paagi aron dili maluya pagpangitag basura” suma ni Ocañada.
Gipasabot niya nga tinarong iyang bisyo sa shabu para iyang sa pamilya nga dunay makaon.
Ang iyang bisyo dili dautan para niya, kay iyang tripping mao man ang pagpamasura.
Matod niya nga ang uban, nag-triping sa pagpanulis, pusil ug ubang kremin.
Hinuon nagmahay si Ocañada tungod kay sa maong bisyo siya nadakpan.
Naluoy siyang naghunahuna sa iyang mga gagmay nga bata ug samot nagkalisod ang pamugas sa iyang pamilya.
Giawhag niya kadtong ubang basurero nga manuyupay nga biyaan na ang maong bisyo. / GPL