Bata nahu’g sa 27th flr. sa condo unit sa Lahug

Bata nahu’g sa 27th flr. sa condo unit sa Lahug

Patay na nga nadangat sa pribadong tambalanan ang 4 anyos nga batang lalaki nga nahagbong sa ika 27 nga andana ug nitugpa sa canopy sa third floor sa condominium alas 6 sa buntag sa Lunes, Abril 8, 2024 sa La Guardia Extension, Brgy. Lahug, dakbayan sa Sugbo.

Si Police Major Romeo Caacoy, Jr., hepe sa Mabolo police station nga nahinabi sa Superbalita Cebu nagkanayon nga nadawat nila ang alarma alas 9:40 na sa buntag. Ngan sa condominium, bata ug inahan gipugngan ning mantalaan.

Sa ilang imbestigasyon, ang inahan niasoy sa imbestigador nga nigawas siya sa ilang lawak kay nagtimpla og kape.

Sa iyang pagbalik, wala na ang iyang anak hinungdan nga iyang gipangita apan wala niya makit-i sa ilang condo unit.

Nigawas siya sa lobby sa ilang unit ug nadungog niya nga dunay usa ka bata nga natagak.

“Nakuyawan na siya. Iyang gi­susi sa ubos, iyaha gyud nga anak. Nakatikang daw guro sa balcony sa likod. Naay may gamay’ng lingkuran,” sumala ni Caacoy.

Matod ni Caacoy nga nagpa­dayon pa sila sa ilang imbestigasyon ug ilang balikan aron kuhaan og dugang impormasyon ang inahan.

Ang condo unit gi-cordon sa Scene of the Crime Operation (SOCO). Matod ni Caacoy nga cooperative ra sa kapulisan ang inahan apan mopahiga­yon sila og inspection sa unit.

Nagpaabot sila sa kopya sa CCTV camera footage nga ihatag sa management sa condominium. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph