Nagtingkagol sa Parian Police Station 1 ang usa ka drug personality human ma buy-bust alas 10:55 sa gabii sa Sabado, Hulyo 5, 2025 sa Sitio Riverside, Barangay Lorega San Miguel sa siyudad sa Sugbo.
Ang nadakpan giila nga si Joel Lunop Mario alyas Bata, 41, residente sa Sitio Lawis sa maong barangay.
Nakuha gikan kaniya ang mga pinutos sa gituohang shabu nga motimbang sa 8 gramos nga dunay standard drug price nga P54,400.
Matud ni Police Major Marvin Fegarido, ang hepe sa Parian Police Station, nga gimonitor nila ang suspek human sila makadawat og impormasyon nga mao kiniy kuhaanan og ilegal nga drugas sa mga drug user sa maong lugar.
Ila dayon kini nga gipanid-an ug nasuta nga tinuod ang impormasyon.
Nagsugod matud pa sa ginagmay si alyas Bata hangtud nga nag-anam og kadaku ang gidaghanon sa ilegal nga drugas nga iyang gipamaligya.
Tungod niini ilang gipahigayon ang buy-bust nga miresulta sa pagkasikop ni Bata.
Kasong kalapasan sa Section 5 ug 11, Article II, Republic Act 9165 ang ipasaka sa Parian Police Station batok sa suspek. / AYB