Gipahimutang na sa Home Care Facility kadtong 12-anyos nga bata nga nakita sa viral video nga gilumsan sa iyang lola sa Sitio Balanghoy, Barangay Gun-ob, Lapu-Lapu City.
Kini gikompirmar sa hepe sa operations sa City Social Welfare and Development Office (CSWDO) Buena Fe Remocaldo niadtong Huwebes, Hulyo 10.
Matod ni Remocaldo ang bata gibalhin sa maong pasilidad niadtong Miyerkules sa hapon, Hulyo 9, human giinterbyu sa mga social worker.
Ang insidente nga nakuhaan og video dili usa ka talagsaon nga kaso.
Gibutyag sa bata nga ang pisikal nga pagdisiplina sa iyang lola pirmanente sa higayon nga magpabadlong siya o makasala.
Bisan pa niini, gipahayag sa bata nga dili niya gusto nga mapriso ang iyang lola.
Gibutyag usab ni Remocaldo nga ang inahan sa bata gikataho nga nakasinati usab og susamang abuso gikan sa lola kaniadto.
Basi sa resulta sa interbyu ug inisyal nga assessment, nakahukom ang CSWDO nga alang sa kaayohan sa bata nga ibutang siya sa Home Care samtang gipahigayon ang dugang nga imbestigasyon.
“Any decision we make will be for the best interest of the child,”matod ni Remocaldo. /Frances Ibo, VSU Intern