Namatay ang 9 anyos nga batang babaye, samtang naangol ang walo niya ka kauban human nalintuwad ang ilang gisakyan’g multicab alas 6:20 sa gabii sa Dominggo, Abril 6, 2025, sa may provincial road sa Barangay Cantumog, Lungsod sa Carmen.
Si Samantha Faith Palallos Tejero, 9, namatay sa alas 9 sa gabii sa Dominggo human kini gidala sa tambalanan sa Dakbayan sa Danao.
Ang Suzuki minivan nga dunay plaka JAR 9998 gimaneho ni Ricky Cañacao Tejero, 34, minyo nga taga Barangay Polpogan, Lungsod sa Consolacion.
Ang mga pasahero nga naangol mao sila si Jennifer Jejan Tejero, 35, minyo, taga Brgy. Polpogan, ug ang anak niini nga si Cyrus Renz, 11 anyos, Rommel Cañacao Tejero, 36, minyo nga taga Barangay Cansaga, Consolacion, Erlin Palallos Tejero, 34, minyo, taga Cansaga, Vanz Riel Palallos Tejero, 11 anyos, taga Cansaga, Venz Palallos Tejero, usa ka tuig ang edad, taga Consolacion, Maria Decena Cañacao Tejero, 54 anyos, ug Benjamin Valle Tejero, 57 anyos, minyo.
Si Police Captain Jessie Tañola, hepe sa Carmen Police Station, nibutyag sa Superbalita Cebu nga namatay ang bata tungod sa grabe’ng kadaut sa ulo.
Matud niya nga 11 ka tawo tanan ang sakay sa multicab nga pulos mga paryente gikan nga nanuroy sa Durano Eco-farm Resort, sa Barangay Corte, Lungsod sa Carmen.
Dugang niya nga nagdulhog ang minivan dihang nawad-an og brake, hinungdan nga gibangga sa driver sa punoan sa lubi apan nabalitok kini.
“Kusog ang impact sa bangga maong nabalitok ang mini van! Kini intawon ang bata namatay na grabihan sa ulo kay nanglagom naman pagtabang sa ni-rescue,” matod ni Tañola.
Gidali sa pagdala ang mga biktima sa Cebu Provincial Hospital sa Danao City, apan gideklara nga patay si Samantha pipila ka oras ang milabay./ GPL