Nag-viral nga video nakatabang sa pagkasikop sa usa ka lalaki nga giingong maoy nibunlot sa usa ka 12 anyos nga batang babaye mga alas 4 sa Biyernes sa hapon, Marso 22, 2024 sa Brgy. East Poblacion, dakbayan sa Naga, habagatang Sugbo.
Pinaagi sa video nga gi-post ni Wilson Enoc, usa ka tawag ang nadawat sa mga polis sa alas 12 sa tungang gabii sa Sabado kalabot sa usa ka tawo nga natukma sa video nga nakit-an sa Boardwalk sa nahisgutang barangay.
Tuod man, nasikop sa kapulisan ang suspek nga giila nga si Alendro Ebol Maglasang, 43 , ulitawo, construction worker, taga Brgy. Matab-ang, Siyudad sa Toledo.
Sa interview sa Superbalita Cebu kang City of Naga Police chief Lt. Col. William Homoc sa Sabado, nasayran nga ang insidente nahitabo atubangan sa Pollitos, Brgy. East Poblacion.
Matod ni Homoc nga ang biktima nagpanuigon og 12 anyos, tinun-an sa grade 7.
Naglakaw ang biktima gikan sa eskwelahan ug gisundan sa suspek nga nag sul-ob og kolor itom ug nagtaptap sa nawong og panaptong puti.
Makita sa video nga gikalitan og bunlot ang bata apan maayo na lang gani kay may nakakita nga laing babaye ug gibuhian ang biktima.
Si Maglasang dali nga nibiya ug nisakay sa usa ka publikong sakyanan.
Matod pa ni Homoc nga ang biktima gikuyogan sa iyang lola sa pagpa blotter sa ilang buhatan ug pagkahuman, ilang gipahigayon ang hot pursuit operation.
Niana nang tungang gabii nasikop sa kapulisan ang suspek.
Si Homoc niingon nga si Maglasang hubog kaayo dihang ilang nasikop ug nanghimakak nga siya ang nibunlot sa bata.
Apan dihang gipaatubang ang biktima sa suspek, nalisang og maayo ang bata ug niila kaniya nga maoy nibunlot.
Ilang gipahiling ang bata ug nasuta nga duna kini bun-og ug nahadlok og maayo.
Hayan ilang pasakaan ang suspek og kalapasan sa anti-child abuse law sa Lunes.
Ang suspek gitanggong sa Naga City Police Station alang sa pagpasaka sa tukmang kaso.
Matod ni Homoc nga ang CCTV footage ni Enoc maoy usa sa mga ebidensya nga ilang gamiton batok sa suspek. (DVG)