Gisaway sa BAYAN Central Visayas ang Senado sa Pilipinas tungod sa pagbalik sa impeachment complaint batok kang Bise Presidente Sara Duterte ngadto sa House of Representatives (HOR) kaniadtong Martes.
Si Jaime Paglinawan, Chairperson sa BAYAN Central Visayas, nagkanayon nga ang maong lakang sa Senado nipahunong sa impeachment proceedings.
Kaniadtong Martes sa gabii, Hunyo 11, 2025, 18 ka senador ang niboto pabor, samtang lima ang supak, sa mosyon sa pag-remand sa mga artikulo sa impeachment batok sa Bise Presidente ngadto sa HOR alang sa dugang constitutional review.
Gipasanginlan ni Paglinawan ang 18 ka senador nga napakyas pagtuman sa ilang katungdanan sa konstitusyon ug giprotektahan si Duterte gikan sa pagpanubag sa seryosong mga pasangil lakip na ang korapsyon, unexplained wealth, ug sayop nga paggamit sa confidential funds.
"Kini usa ka pagluib sa katawhan. Gipili nila nga panalipdan si Duterte imbes nga pahibaw-on ang katawhan sa kamatuoran bahin sa unsaon paggamit sa pundo sa publiko," matod ni Paglinawan.
Gisaway ni Paglinawan si Senate President Chiz Escudero ug ang majority bloc sa Senado sa paglangan sa proseso sa impeachment sulod sa upat ka bulan human madawat ang Article of Impeachment nga gipadala sa Ubos nga Balay Balauranan.
"Gigamit ni Escudero ang lainlaing taktika aron malikayan ang pagpatawag sa Senado isip korte sa impeachment," matod niya. / EHP