Giposasan ang usa ka 32 anyos nga mahuyang human nangawat og duha ka selpon alas 5:30 sa buntag, Huwebes, Hulyo 17, 2025 sa Sitio Lawis, Alaska, Barangay Mambaling, Dakbayan sa Sugbo.
Apan ang suspek nga si Jodemar Lopez, kasamtangan’g nagpuyo sa dapit ug lumad nga taga lungsod sa Sibonga, nanghimakak sa pasangil atol sa interbyu sa Superbalita Cebu.
Matod niya nga naabot siya sa lugar kay “nanglaki.”
Apan adunay mga silingan nga misaksi nga ang maong mahuyang og iyang kakunsabo nga si alas Jas, 21, ulitawo nga taga Sitio Lawis, kinsa naila nga kawatan, maoy nagkuha.
Ang biktima nga si Irene Castillon Suson, 31 anyos, dalaga nga taga Sitio Lawis, maoy nisikop sa mga suspek pinasikad sa citizen’s arrest uban sa mga tanod ug mi-turnover kanila sa Mambaling Police Station.
Wala na marekober ang duha ka selpon nga nagkantidad og P10 mil.
Apan nakuha pagbalik ang Bluetooth speaker nga balor og P500. / GPL