Napusasan ang 46-anyos nga bayot nga nalambigit sa Online Sexual Exploitation sa usa sa mga barangay sa Dakbayan sa Lapu-Lapu niadtong alas 11:00 sa gabii, Martes, Marso 31, 2026.
Na-rescue sab ang 14-anyos nga batang lalaki nga giingo’ng gipuyo sa suspek.
Ang mga sakop sa Women and Children Protection Center (WCPC) Visayas Field Unit nga gipangulohan sa ilang hepe, Police Lieutenant Colonel Janette Rafter, inabagan sa Regional Anti-Cybercrime Unit (Racu) 7 ni-serve sa Warrant to Search, Seize and Examine Computer Data (WSSECD) batok sa maong suspek.
Atol sa pagsusi sa mga gadget sa suspek, nakita ang mga Child Sexual Abuse or Exploitation Materials (CSAEM) ilabi na ang mga hubo nga hulagway sa mga batan-ong lalaki.
Ang maong mga picture gibaligya sa suspek ngadto sa iyang kliyente diha sa online.
INFORMANT
Nasayran sa WCPC kabahin sa maong sakop sa LGBTQ nga nagbaligyaan og mga hulagway nga bastos, human nga ang ilang counterpart sa gawas sa nasod nipahibalo sa maong kalihukan.
Nilusad og validation ang WCPC inabagan sa Non-Government Organization ug nasuta nga tinuod ang maong kasayuran gikan sa ilang informant.
Atol sa operasyon nakuha ang mga cellular phone sa balay sa suspek.
Gihimo dayon sa Racu 7 ang forensic examination sa mga gadget nga nasakmit.
Naladlad ang mga picture sa mga batan-ong lalaki nga naghubo. Giingong pahuboon sa suspek ang mga bata apil na ang 14 anyos nga gipuyo sa suspek.
Diha sa maong balay gihimo ang pagkuha sa mga picture ingon man video gamit ang cellular phone nga maoy iyang ibaligya sa iyang mga customer sa online.
Kalapasan sa Republic Act 11930, Anti-Online Sexual Abuse o Exploitation of Children ug Anti-Child Sexual Abuse o Exploitation Material Act (CSAEM) ang kaso batok sa maong dinakpan.
Ang hepe sa Racu 7 nga si Police Colonel Artemio Ricabo nibutyag nga ang ilang ahensiya nipasalig nga padayon nga mohatag og proteksyon sa kabataan nga malikay sa online exploitation.
Gidayeg sab ni Police General Jose Melencio Nartatez Jr. ang dali nga pagkasikop sa suspek ug pag-rescue sa 14 anyos.
Giawhag sa opisyal ang mga ginikanan nga bantayan kanunay ang ilang mga anak ug ablihan ang ilang komunikasyon aron dili kini mabiktima sa mga dautang elemento diha sa internet.
Kon mamatikdan nga lahi na ang linihukan niini, labing maayo nga susihon dayon kini aron masalbar sa labing dali nga panahon ug malikay sa cybercrime. /