Gibalhog sa Parian Police Station ang usa ka mahuyang nga giingong nagpadala og mga malaw-ay nga hulagway sa mga menor de edad ingon man mga video ngadto sa social media account sa mga langyaw nga customer bugti sa kwarta.
Ang 32 anyos nga si alyas May, gidakop sa mga sakop sa Women and Children Protection Center (WCPC) sa Huwebes, Hunyo 19, 2025, sa iyang gipuy-an nga pension house nga nahimutang sa dalan Pelaez, Barangay Kamagayan, Dakbayan sa Sugbo.
Kasong kalapasan sa Republic Act No. 11930 o Anti-Online Sexual Abuse or Exploitation of Children (OSAEC) and Anti-Child Sexual Abuse or Exploitation Materials (CSAEM) Act ang giandam nga kaso batok sa maong dinakpan.
Base sa taho sa kapulisan, adunay nakahatag kanila og impormasyon labot sa ilegal nga kalihokan sa maong mahuyang hinungdan nga ila kining gi-monitor.
Human sa gihimong lawom nga pakisusi, napamatud-an nga nalambigit kini sa cybersex activity hinungdan gisilbihan dayon og search warrant.
Sa pakighinabi sa dinakpan, hugot kining mihimakak sa pasangil batok kaniya.
Hinuon, iyang gipasangil nga gigamit sa iyang higala nga usa gihapon ka mahuyang ang iyang Facebook account alang sa maong ilegal nga kalihokan.
Depensa ni May nga iyang gika-estorya ug gipangutana ang iyang higala kabahin sa maong panghitabo sa dihang iyang nahibaw-an nga gipangita na siya sa kapolisan, apan dili kini motubag sa iyaha.
Dugang pa niya nga wala niya mabantayi nga aduna na’y transaction nga nahitabo sa iyang messenger account sanglit di kaayo siya mogamit niini. / JDG