GIPADAKOP ang usa ka ba-yot nga cashier mismo sa iyahang manager human giingong nangunay og panga-wat sa gitrabahuan niini nga convenience store sa Barangay Banilad, Dakbayan sa Sugbo aron isustento sa iyang uyab nga lalaki.
Nahitabo ang insidente mga alas 7 pasado sa gabii niadtong Huwebes, Hunyo 3, 2025, apan na-report kini mga alas 10:50 na sa gabii.
Ang suspek nailhan lang sa alyas nga Kat, 22 anyos, lumad nga taga Mindanao apan kasamtangang nagpuyo sa Barangay Banilad, Dakbayan sa Sugbo.
Subay sa imbestigasyon sa Mabolo Police Station nga ikalimang higayon na kini gibuhat sa suspek diin ma-ngawat siya og kuwarta nga P400 ngadto sa P2,000 ug iya kining ipasa gamit ang Gcash account sa gitrabahuan nga convenience store padulong sa iyang personal account.
Sa habig sa suspek, niangkon siya sa salaod nga gipasangil kaniya ug nasakpan sab siya sa iyang kauban nga cashier nga nipasa na pud og P2,158 nga kuwarta ngadto sa iyang personal account.
Si Kat nitug-an nga nabuhat niya ang pagpangawat tungod kay matod pa wala na siya'y pangsustento sa iyang lalaki.
Matod niya nga gibuhat niya ang tanan tungod sa iyang gugma sa maong lalaki.
Dako ang iyang pagmahay sanglit usa sab siya ka breadwinner nga nagsuporta sa iyang upat ka manghod ug lola nga naa sa Mindanao.
Nisaad siya nga dili na niya usbon ang maong pagpangawat ug andam siyang ma-ngayo og pasaylo.
Sa pagkakaron, giandam na sa Mabolo Police Station ang kasong qualified theft batok ni Kat. / JDG