USA ka bayot nga giingong wala makasabot sa epekto sa illegal nga drugas ang nanghasi ala 1 sa kadlawon sa Lunes, Pebrero 10, 2025, sa Sityo Ibabao, Barangay Mambaling, Dakbayan sa Sugbo.
Si alyas Kimberly, nagpuyo sa maong lugar, gibalhog sa Mambaling Police Station human sa hitabo.
Gipadakop siya sa iyang mga kabanay human nanghasi sa ilang lugar tungod sa kahubog, sabog sa drugas.
Matud ni Patrolman Felmar Gomez, imbestigador sa Mambaling Police Station, nga nahinabi sa Superbalita Cebu, nga mismo ang inahan ug ubang igsoon maoy mosang-at sa kasong alarm and scandal batok sa mahuyang sanglit nauwaw sila sa ilang mga silingan sa higayon nga manghasi ang suspek.
Matud ni Gomez, nga taud-taud na nga nagumon ang suspek sa ginadiling drugas.
Matud sa mga reklamante nga manghasi ang suspek basta mobaba ang tama sa illegal nga drugas.
“Basta mobaba na gani iyang tama pwerti na niining hasola! Isog kaayo manghasi unya maglisod ang kabanay kay daku kaayo ning bayota,” miingon si Gomez.
“Mag-hallucination kining bayot kun mohupas ang tama, magsigeg singgit singgit, ipangbunal ang mga butang. Sila mismo nga pamilya naapil sa kahasol kay dili na sila makatulog,” dugang niya.
Atol sa hitabo, naglisod ang mga kabanay, silingan pagkupot sa suspek kay magsige kini og kisikisi nga tungod niini nahubo ang iyang purol.
Gani ang mga polis nga niresponde na taudtauran pa una pa napusasan ang suspek gumikan sa ka kusgan niini.
Sa nakuhang impormasyon sa Superbalita Cebu, giingong adunay gi-selosang tawo ang mahuyang tungod sa gugma. / GPL