Mga duwa karon:
5:00 pm- San Miguel batok Meralco
7:30 pm- Ginebra batok Converge
Nipadayag og determinasyon ang No. 1 team San Miguel Beermen nga ilahang palagputon og sayo ang No. 8 Meralco Bolts sa ilang panagsangka sa premirong duwa karong Biyernes, Hunyo 20, 2025, sa quarter-finals sa Philippine Basketball Association (PBA) Season 49 Philippine Cup sa Ninoy Aquino Stadium.
Ang Beermen nagkinahanglan lang og usa ka daog aron ilaha kining mahimo tungod sa dala nilang twice-to-beat nga bintaha, nga maoy insentibo sa ilang pagkasulod sa Top 4.
Nasayod ang Bolts sa intensyon sa Beermen ug ilaha kining gipangandaman og maayo.
“We’re ready. We’ve been here a lot of times so I think we’d really respond well in this first game. But you have to get to one before you get to two,” matod ni Meralco coach Luigi Trillo.
Gipasabot ni Beermen coach Leo Austria nga nagdilaab sa kainit ang pagbati sa iyang mga magduduwa gumikan sa ilang nasinati sa niaging Commissioner’s Cup diin wala sila nakalusot sa elimination round, usa ka talagsaong kasinatian sa Beermen.
Sa main game, magsangka ang No. 4 Brgy. Ginebra Gin Kings ug No. 8 Converge FiberXers.
Sama sa Beermen, ang Gin Kings naggunit sab og twice-to-beat nga bintaha ning sangkaa.
Sa laing bahin, nakakita pa og laing pagsidlak sa adlaw ang No. 6 TNT Tropang 5G ug No. 7 Rain or Shine Elasto Painters human nila gipangbuntog ang ilang tagsatagsa ka twice-to-beat nga kontra niadtong Miyerkules, Hunyo 18.
Ang Tropang 5G, nga nagtinguhang masakmit ang talagsaong Grandslam title ning maong komperensya, ningpakaging sa No. 3 Magnolia Chicken Timplados Hotshots, 89-88, samtang ang Elasto Painters ninglupig sa No. 2 NLEX Road Warriors, 92-89. / ESL