Mas gipanghubog sa San Miguel Beermen ang Magnolia Chicken Timplados Hotshots, 109-85, sa Game 2 aron pagposte og 2-0 nga bintaha sa championship series sa Philippine Basketball Association (PBA) Season 48 Commissioner’s Cup niadtong Dominggo sa gabii, Pebrero 4, 2024, sa Mall of Asia (MOA) Arena sa Pasay City.
Sama sa naandan, ang Beermen gipangulohan na sab sa ilang impresibong import nga si Bennie Boatwright pinaagi sa iyang 34 puntos.
Niamot og 20 puntos si CJ Perez alang sa kadaugan, nihatag og 19 puntos si June Mar Fajardo lakip na niini ang talagsaon niyang back-to-back three-pointers samtang nitampo og 11 puntos si Marcio Lassiter.
Ang Beermen, nga ningposte og 103-95 nga kadaugan sa Game 1, mao ang nagkontrolar sa Game 2 gikan sa sinugdanan hangtod sa katapusan.
Pagkahuman sa 3rd quarter, ningburot na ang labaw sa Beermen ngadto sa 79-58 ug human niini, wala na sila milingi og balik.
Puntos matag usa:
San Miguel (109) – Boatwright 34, Perez 20, Fajardo 19, Lassiter 11, Cruz 10, Trollano 5, Ross 3, Tautuaa 2, Teng 2, Jimenez 2, Mallilin 1. Magnolia (85) – Bey 22, Barroca 11, Escoto 10, Sangalang 8, Jalalon 6, Corpuz 5, Lee 5,c Dela Rosa 4, Mendoza 4, Abueva 3, Laput 3, Tratter 2, Eriobu 2. Quarters: 31-25; 54-41; 79-58; 109-85.