Nakuha pagbalik sa San Miguel Beermen ang titulo sa Philippine Basketball Association (PBA) Philippine Cup ug gipakgang ang Grand Slam hope sa TNT Tropang 5G niadtong Biyernes sa gabii, Hulyo 25, sa PhilSports Arena.
Gitumba sa Beermen ang Tropang 5G sa iskor nga 107-96 sa Game 6 sa PBA Finals aron tapuson ang championship series, 4-2.
Ang Cebuano bigman nga si June Mar Fajardo nagbangis sa maong duwa, mipakatap kini og 24 puntos gikan sa hapit perpekto nga 11-of-12 shooting lakip pa ang 12 rebounds ug tulo ka assists.
Si CJ Perez niamot pud og 24 puntos, samtang si Jericho Cruz nitunol og 13 puntos, nidugang si Don Trollano og 12 puntos samtang si Mo Tautuaa niamot og 10 puntos para sa Beermen.
Tungod sa iyang solid all-around performance sa tibuok PBA Finals, nakuha ni Cruz ang Finals MVP award. Nag-average siya og 13.8 puntos, 3.5 rebounds ug 3.3 assists sa unom ka duwa.
“Matagal kaming hindi nag-champion kaya thankful kami nakuha namin itong championship,” sigun ni Fajardo, kinsa uwahing midaog sa All-Filipino crown tuig 2022.
Ang titulo karon mao ang ika-30 overall title sa San Miguel sa PBA.
Ang TNT nidaog sa Governors' Cup ug Commissioner's Cup, ang Philippine Cup nalang unta ang kulang sa ilang Grand Slam bid.
Puntos matag-usa:
San Miguel (107) - Fajardo 24, Perez 24, Cruz 13, Trollano 12, Tautuaa 10, Ross 9, Lassiter 7, Brondial 4, Tiongson 4.
TNT (96) - Oftana 19, Williams 17, Ganuelas-Rosser 15, Heading 13, Vosotros 13, Pogoy 12, Khobuntin 5, Aurin 2. / RSC