Naangkon sa San Miguel Beermen ang ikaduhang luna sa finals human nila gipanghubog ang Brgy. Ginebra Gin Kings, 100-93, sa deciding Game 7 sa ilang semi-finals series sa Philippine Basketball Association (PBA) Season 49 Philippine Cup niadtong Miyerkules sa gabii, Hulyo 9, 2025, sa Smart Araneta Coliseum.
Sa kadaugan, nakuha sa Beermen ang katungod sa pagpakigbatok sa Grandslam-seeking TNT Tropang 5G sa championship best-of-seven series nga sugdan karong Dominggo, Hulyo 13.
Napuno sa kabalaka ang Beermen dihang nakasinati og pagpanakit sa tuo nga paa ang ilang Sugboanong higante nga si JuneMar Fajardo sa hinapos nga bahin pa lang sa 2nd quarter.
Hinuon, nakabalik ra pagduwa ang eight-time MVP ug napangulohan niya ang Beermen pinaagi sa iyang 21 puntos ug 19 rebounds.
“Nag-tight lang ‘yung hamstring ko. Akala ko may nag-stretch ‘yung muscle. Pero ok lang naman. May pahinga naman kami. May therapy naman ako,” matod sa produkto sa University of Cebu (UC) Webmasters nga napatik sa Spin.ph.
Nikawat og dakong atensyon ning sangkaa mao ang pagbalik sa opensa sa beteranong pointguard sa Beermen nga si Chris Ross, kinsa niamot og 19 puntos alang sa kadaugan.
Nakatabang sab og dako sa Beermen mao sila si CJ Perez ug Moala Tautuaa.
Ang nangahisgutang mga magduduwa mao ang hingpit nga nagpabangon sa Beermen gikan sa 62-73 nga pagkalubong sa 3rd quarter.
“It’s very clear they never gave up especially in the fourth. They all realized they need to step up, and they did step up,” matod ni Beermen coach Leo Austria nga napatik sa www.pba.ph.
Puntos matag usa:
San Miguel (100) - Fajardo 21, Ross 19, Perez 15, Tautuaa 14, Trollano 10, Tiongson 6, Brondial 6, Lassiter 5, Cruz 4.
Ginebra (93) - Malonzo 22, Thompson 16, Abarrientos 16, Rosario 15, Holt 12, J.Aguilar 12. Quarters: 17-23, 45-44, 66-73, 100-93. / ESL