Nahibalik ang San Miguel Beermen sa naandan nilang puwesto – numero uno.
Kini human gipanghubog og maayo sa Beermen ang NorthPort Batang Pier, 126-91, sa main game niadtong Dominggo, Hunyo 15, 2025, atol sa pagtiklop sa elimination round sa Philippine Basketball Association (PBA) Season 49 Philippine Cup sa Ynares Center sa Antipolo City.
Ang Beermen ninghuman sa elimination round dala ang 8-3 nga rekord diin natanggong sila sa quadruple-tie sa liderato kauban ang NLEX Road Warriors, Magnolia Chicken Timplados Hotshots ug Brgy. Ginebra Gin Kings.
Hinuon dihang gibuak ang panagtabla pinaagi qoutient, nigawas nga No. 1 ang Beermen, No. 2 ang Road Warriors, No. 3 ang Hotshots ug No. 4 ang Gin Kings.
Sa ilang pagkasulod sa Top 4, ang Beermen, Road Warriors, Hotshots ug Gin Kings maggunit og twice-to-beat nga benepisyo sa ilang tahas sa quarter-finals batok sa lainlaing kontra.
Sa quarter-finals, magparang ang No. 1 batok No. 8, No. 2 batok No. 7, No. 3 batok No. 6, ug No. 4 batok No. 5.
Ang Gin Kings nakakumpayot sa No. 4 human nila gipasarasay ang Rain or Shine Elasto Painters, 98-80, sa premirong duwa niadtong Dominggo. / ESL