Naselyo na sa San Miguel Beermen ang No. 1 nga puwesto human nila gipanghubog ang NLEX Road Warriors, 120-103, sa main game niadtong Dominggo sa gabii, Abril 28, 2024, sa Philippine Basketball Association (PBA) Season 48 Philippine Cup sa Philsports Arena sa Pasig City.
Ang Beermen ningsulbong sa liderato dala ang 9-0 nga rekord ug nagkinahanglan na lang kining duha ka mga daog aron makarehistro og perpektong rekord sa elimination round.
Gipangulohan na sab ni CJ Perez ang Beermen pinaagi sa iyang 30 puntos, nidugang og 20 puntos ug 21 ka rebounds si June Mar Fajardo samtang ning-amot og 15 puntos matag usa sila si Terrence Romeo ug Jericho Cruz.
“Basta nakuha ang panalo, yun ang importante,” batbat ni Fajardo.
Ang Road Warriors, nga ningkombati nga wala ang ilang leading scorer nga si Robert Bolick, nahagbong sa 5-4 nga rekord.
Sa laing duwa, gipanglampornas sa Meralco Bolts ang Magnolia Chicken Timplados Hotshots, 74-51. Ang Bolts ningsaka sa 5-5 nga rekord samtang natagak sa 5-4 nga baraha ang Hotshots. / ESL