Nakatutok ang atensyon sa San Miguel Beermen sa numero 30 sa ilang pagpakigbatok og balik sa TNT Tropang 5G karong Miyerkules sa gabii, Hulyo 23, 2025, sa Game 5 sa Philippine Basketball Association (PBA) Season 49 Philippine Cup finals series sa Smart Araneta Coliseum.
Ang numero 30 magrepresentar sa kinatibuk-ang gidaghanon nga malabning kampyunato sa Beermen kon ilang mabuntog pagbalik ang Tropang 5G, nga maoy magtiklop og sayo ning maong best-of-seven series.
Ang Beermen, nga maoy winningest team sa labing unang professional nga liga sa Asya, nagtinguha sab sa ilang ika-10 nga titulo sa Philippine Cup, nga gitawag kaniadto og All-Filipino conference.
Human sa ilang kontrobersyal nga pagkapilde sa Game 1, 96-99, sa series, ang Beermen namungot ug ilang gipanghubog ang Tropang 5G sa nagsunod tulo ka mga duwa, 98-92, 108-88, ug 105-91, aron pagposte og dominanteng bintaha sa series, 3-1.
Usa na lang ka daog ug maugbok pa og samot sa Beermen ang ilang legasiya.
Labing seguro, dili bastabasta motugot niini ang Tropang 5G, nga aduna sab mahinungdanong misyon – mahimong ikalimang team nga makaangkon sa talagsaong Grandslam title sunod sa Crispa Redmanizers (1976 ug 1983), San Miguel (1989), Alaska Milkmen (1996), ug San Mig Super Coffee Mixers (2014).
Hinuon, daw silangan na sa imposible nga malampos sa Tropang 5G ang ilang misyon.
Taliwala niini, malaumon gihapon ang mentalidad sa Tropang 5G ug ilaha kining gipahungaw sa mga mensahe sa ilang opisyal nga Facebook page.
“Believe!”, “Lalaban hanggang dulo! On to the next!”, “Down but not out! Babangon at lalaban!”, “Hindi susuko! Samahan at suportahan niyo kami sa Game 5 mga KaTropa!”
Pipila lang kini sa mga mensahe sa Tropang 5G sa social media.
Nasayod ang Beermen nga mao kini ang mentalidad sa Tropang 5G ug ilaha kining gipangandaman.
“The closeout game’s the hardest but we got a lot of veterans in that locker room,” matod sa usa sa beteranong mga sakop sa Beermen nga si Chris Ross, nga napatik sa www.pba.ph. / ESL