Mosuway pagsulod sa Top 4 ang San Miguel Beermen sa ilang pagpakigbatok sa Converge FiberXers sa krusyal nga engkuwentro sa main game karong Miyerkules sa gabii, Hunyo 11, 2025, sa Philippine Basketball Association (PBA) Season 49 Philippine Cup sa Ninoy Aquino Stadium sa Manila.
Ang Beermen kasamtangang naa sa ikaduhang luna dala ang 7-2 nga rekord apan taliwala niini, wala pa sila nakaseguro og puwesto sa Top 4, nga maghatag og twice-to-beat nga benepisyo sa nagkaduol nga quarter-finals.
Kon mapilde ang Beermen, hayan posibleng malubog ang ilang purohan sa inilugay sa Top 4.
Sa ilang bahin, ang FiberXers, nga adunay 6-4 nga rekord, natanggong sa three-way tie sa ikalimang puwesto kauban ang Grandslam-seeking TNT Tropang Giga ug Rain or Shine Elasto Painters.
Ning puntoha, buhi pa ang paglaom sa FiberXers nga makasulod sa Top 4 depende sa resulta sa nahabiling mga duwa sa elimination round.
Apan kon mapilde ang FiberXers, mahanaw sa hingpit ang ilang purohan sa Top 4.
Ning engkuwentruha, giatangan og maayo ang pagpakigparang sa Sugboanong higante sa Beermen nga si June Mar Fajardo sa batan-ong bigmen sa FiberXers nga sila si Justin Arana ug Justine Baltazar.
Sa premirong duwa, ang league-leader NLEX Road Warriors makigbatok sa nagkaguliyang nga NorthPort Batang Pier.
Ang Road Warriors, nga kasamtangang nag-inusara sa ibabaw dala ang 8-2 nga rekord, mao pa lang ang bugtong puwersa nga nakaseguro na’g luna sa Top 4 samtang ang Batang Pier nahilakip sa upat ka teams nga wala na’y purohan nga makaabante sa quarter-finals.
Taliwala niini, giklaro ni NLEX coach Jong Uichico nga dili sila molugak bisan gamay batok sa Batang Pier, nga adunay 1-8 nga rekord.
Gipasabot ni Uichico nga mokombati gihapon sila’g maayo ning sangkaa aron mas mahashasan ang ilang kapabilidad isip usa ka puwersa. / ESL