Nakaipsot ang San Miguel Beermen sa pagpanghudlat sa Talk N’ Text (TNT) Tropang Giga aron iposte ang munasginhawang kadaugan, 91-89, niadtong Dominggo, Marso 17, 2024, sa Philippine Basketball Association (PBA) Season 48 Philippine Cup sa Ynares Sports Center sa Antipolo City.
Sa kadaugan, ang Beermen ningsaka sa 2-0 nga rekord samtang ang Tropang Giga nahagbong sa 2-2 nga baraha.
Gikan sa 15 puntos nga biya, ang Tropang Giga ninggukod hangtod nga nakasikit sila pagbalik sa hinapos nga bahin.
Unya aduna pa gyud untay kahigayunan ang Tropang Giga gumikan kay naa nila ang posisyon sa bola sa nahabiling 15 ka mga segundos diin niadtong mga gutloa, igo na lang naglabaw ang Beermen og duha ka mga puntos, 91-89.
Ang bag-ong sakop sa Tropang Giga nga si Brandon Ganuelas-Rosser nakahigayon pa pag-itsa sa three-point area sa himatyong mga segundos nga posible untang makapabali sa resulta apan nasipyat lang.
Ang kadaugan sa Beermen gipangulohan sa Sugboanong higante nga si June Mar Fajardo pinaagi sa iyang 15 puntos ug 17 rebounds samtang ningdugang og 15 pntos matag usa sila si 12 puntos matag usa sila si Marcio Lassiter, Don Trollano ug Jericho Cruz.
Ang Tropang Giga gipangulohan ni Jayson Castro pinaagi sa iyang 20 puntos, niamot og 15 puntos si Roger Pogoy samtang ningtunol og 14 puntos sila si Kelly Williams ug Calvin Oftana.
Sa laing duwa, nakatilaw na og himaya ang Rain or Shine Elasto Painters human nila gipangbuntog ang Phoenix Super LPG Fuel Masters, 100-85.
Mao kini ang labing unang daog sa Elasto Painters sulod sa lima ka mga duwa samtang ang Fuel Masters nakatilaw sa ikatulo nilang pilde sulod sa upat ka mga duwa.
Gipangulohan ni Beau Belga ang Elasto Painters pinaagi sa iyang 21 puntos ug 11 ka rebounds samtang nitampo og 19 puntos si Jhonard Clarito.
Ang Fuel Masters, nga ningkombati nga wala ang ilang mga sinaligan nga sila si Tyler Tio, Jason Perkins ug Raoul Soyud (pulos adunay angol), gipangulohan ni Ricci Rivero pinaagi sa iyang 16 puntos. / ESL