Mga duwa karon:
5:00 pm- Blackwater batok Hong Kong
7:30 pm- San Miguel batok Rain or Shine
Magkumbati ang defending champions San Miguel Beermen ug Rain or Shine Elasto Painters sa main game karong Martes sa gabii, Disyembre 10, 2024, sa Philippine Basketball Association (PBA) Season 49 Commissioner’s Cup sa Ynares Sports Center sa Antipolo City.
Ang Beermen mosuway pagbangon gikan sa ilang pagkapilde sa niagi nilang duwa batok sa NLEX Road Warriors, 99-104, samtang ang Elasto Painters nagtinguhang masumpayan ang ilang impresibong daog batok sa guest team Hong Kong Eastern, 99-81.
Ang duha ka kampo parehong adunay 1-1 nga rekord.
Malaumon si Elasto Painters coach Yeng Guiao nga ang ilang dakong daog batok sa Hong Kong Eastern makahatag kanila og dugang kadasig sa pagpakigsangka sa lig-ong puwersa sa Beermen.
Sa premirong duwa, ang Hong Kong Eastern mosuway pagbangon gikan sa pagkapandol ug gilaumang mamungot kini batok sa Blackwater Bossing nga wala pa’y daog sulod sa duha ka duwa.
Ang Hong Kong Eastern nga ningmakmak sa nag-una nilang duha ka kontra una sila nabuntog sa Elasto Painters, makonsiderar nga inilog batok sa Bossing.
Apan labing seguro, ipagawas sa Bossing ang tanan nilang makaya aron maposte ang labing una nilang daog sa komperensya. / ESL