Mga duwa karon:
5:00 pm- San Miguel batok Blackwater
7:30 pm- Meralco batok Terrafirma
Seguradong puwesto sa Top 2 sa Group B ang tinguha sa San Miguel Beermen sa ilang pagpakigsangka sa Blackwater Bossing sa premirong duwa karong Sabado sa hapon, Septiyembre 21, 2024, sa Philippine Basketball Association (PBA) Season 49 Governors’ Cup sa Ninoy Aquino Stadium.
Human sila gibuntog sa Rain or Shine Elasto Painters, 112-122, niadtong Huwebes, Septiyembre 19, ang Beermen ningdakin-as sa ikaduhang luna sa Group B dala ang 6-3 nga baraha sunod sa group leader Elasto Painters, nga ningsaka sa 7-2 nga baraha.
Sa kasamtangan, gikabahin sa Beermen sa ikaduhang puwesto ang Brgy. Ginebra Gin Kings nga nagtinguha sab nga makasulod sa Top 2.
Mahinungdanon ang pagsulod sa Top 2 gumikan kay ikaharong niini ang lower-ranked teams sa laing grupo sa crossover best-of-five quarter-finals.
Ning sangkaa, adunay problema ang Beermen gumikan kay kuwestiyunable pa ang estado sa ilang import nga si Jordan Adams, kinsa gidudahang nakasinati og angol (strained right hamstring) atol sa ilang kapildihan batok sa Elasto Painters.
Kon makaduwa man si Adams, gituohang dili kini makahatag og 100 percent nga duwa, nga puwede kaayong pahimuslan sa Bossing.
Ang Bossing manikaysikay alang sa inilugay sa nahabiling duha ka bakanteng mga puwesto sa Group B alang sa quarter-finals.
Ang Bossing kasamtangan nakigbahin sa NLEX Road Warriors sa ikaupat nga luna sa ilang grupo dala ang 3-5 nga baraha.
Sa main game, magsangka ang Meralco Bolts ug Terrafirma Dyip.
Ang Bolts nagpatong sa ikaduhang luna sa Group A dala ang 6-3 nga rekord samtang nagbitay sa labing ubos ang Dyip nga adunay 1-8 nga baraha.
Ang Bolts nagkinahanglang modaog ning sangkaa aron makaseguro og puwesto sa Top 2 samtang ang Dyip wala na’y paglaom nga makaabante sa sunod round. / ESL