Benepisyaryo sa 4Ps giawhag sa pag apply sa diskwento

Giawhag sa Department of Social Welfare and Development ang mga benepisyaryo sa Pantawid Pamilyang Pilipino Program (4Ps) sa pagpahimulos sa diskwento sa ilang bayranan sa kuryente.

Nunot sa paglugway sa rehistrasyon sa Lifeline Rate Subsidy Program nga naghatag og subsidized rate alang sa mga kustomer sa kuryente nga ubos ang kita, si DSWD 7 Director Shalaine Lucero nanawagan sa mga benepisyaryo sa 4Ps nga mobisita sa ilang distribution utilities o electric cooperative aron maka-apply sa maong programa.

“Nanawagan ta sa mga benepisyaryo sa 4Ps, ilabina kadtong adunay mga koneksyon sa kuryente, nga mo-avail (sa ilang kaugalingon) niining lifeline rate subsidy kay makatabang kini nga makadaginot sila sa ilang binuwan nga galastuhan,” matod ni Lucero sa usa ka pamahayag niadtong Huwebes, Disyembre 14, 2023.

Ang hingpit nga pagpatuman sa programa sugdan unta niadtong Septiyembre.

Tungod sa ubos nga turn-out sa mga aplikante, ang DSWD, Department of Energy (DOE), ug Energy Regulatory Commission (ERC) nakahukom nga i-reset ang deadline ngadto sa Enero 2024.

Ang Lifeline Rate Subsidy Program naghatag og tabang sa mga konsumidor sa kuryente, ilabina niadtong nagpuyo ilawom sa linya sa kakabos, apil ang mga benepisyaryo sa 4Ps ug mga pamilyang marginalized.

Ang mga aplikante sa 4Ps kinahanglan nga adunay binuwan nga konsumo sa kuryente nga 100 kilowatts matag oras o ubos pa.

Mahimo’ng mahatag ang mga diskwento gikan sa 20 hangtod 100 porsyento, depende sa aktuwal nga konsumo.

Matod ni Lucero nga ang mga benepisyaryo sa 4Ps kinahanglang magpakita sa ilang 4Ps ID o uban pang balido nga government-issued ID nga adunay ilang pirma ug address.

Aron mapadali ang rehistrasyon, ang DSWD 7, sa pakigtambayayong sa DOE, ERC, Cebu Electric Cooperative Inc. I ug II ug sa mga siyudad sa Toledo, Carcar ug Cebu, nagtukod sa Lifeline Rate Caravan niadtong Disyembre 9, nga adunay 829 ka 4Ps nga benepisyaryo gikan sa tulo ka local government units nga nag-aplay alang sa programa.

Ang subsidy gihatag ubos sa Republic Act 11552, o usa ka balaod nga nagpalugway ug nagpadako sa pagpatuman sa Lifeline Rate.