Gimanduan ni Bacolod City Mayor Alfredo Abelardo Benitez ang Disaster Risk Reduction and Management Office (DRRMO) nga paspasan ang paghatag og hinabang ngadto sa local government units (LGS) nga naapektuhan sa pagbuto sa Mount Kanlaon.
Matod ni Benitez, gisugo na niya si Dr. Ana Maria Laarni Pornan, hepe sa DRRMO, nga makigkoordinar sa mga opisyal sa Provincial Government aron masayran ang labing daling ayuda alang sa naapektuhan nga mga pamilya.
Kon gikinahanglan, asoy ni Benitez nga andam sab ang dakbayan sa paghatag og pinansyal nga tabang ngadto sa naapektuhang lokal nga mga kagamhanan.
Dugang pa niya nga sa pagkakaron, mas gikinahanglan sa mga residente ang tubig ug pagkaon.
Ang Mount Kanlaon, usa ka stratovolcano sa Negros Island, nibuto pag-usab niadtong Martes, Abril 8, 2025, ug nisabwag kini og abo nga niabot og 4,000 metros ang kataas.
Gikataho nga adunay pag-ulan og nipis nga abo sa pipila ka mga barangay sa Dakbayan sa La Carlota, lakip niini ang mga barangay sa Roberto Salas Benedicto, La Granja, Nagasi, Yubo, Ara-al, San Miguel ug Cubay.
Kini maoy ikatulong higayon nga ningbuto ang nahisgutang bulkan. Una kining nahitabo niadtong Hunyo, 2024, ug gisundan niadtong Disyembre, 2024.
Sa sayo pa lang, niingon na si Pornan nga ilang ihatag ngadto sa probinsya ang mga pagkaon lakip na ang mga tambal ug mga mask nga gikan sa City Health Office.
"It's up to the Province to determine the affected areas for the distribution of the assistance," matod ni Pornan. /MAP