Bfar 7 nagpagawas og pahimangno bahin sa red tide

Nipagawas og pahimangno Bureau of Fisheries and Aquatic Resources (BFAR) 7 niadtong Biyernes, Hunyo 13, 2025 nga temporaryong gidili ang pagpangolekta ug pagbaligya sa tanang klase sa kinhason ug "alamang" gikan sa Siit Bay nga nahimutang sa Barangay Siit, Siaton, sa habagatang Negros Oriental.

Kini human nasuta nga ang mga sample sa tubig positibo sa Pyrodinium bahamense, usa ka makahilo nga microorganism nga maoy hinungdan sa paralytic shellfish poisoning (PSP) o red tide.

Ang pahimangnos, nga gipirmahan ni BFAR 7 Director Mario Ruinata, gibase sa resulta sa laboratory tests nga gihimo sa BFAR 7 Negros Oriental Provincial Fishery Office ug Provincial Agriculturist Office human sa pagkolekta sa sample niadtong Martes, Hunyo 10.

“To protect human lives and lessen the effects on the shellfish industry while awaiting the results of the confirmatory analysis, this warning is issued as a precautionary measure advising the public to avoid gathering, selling, and consuming all types of shellfish and Acetes sp. locally known as ‘alamang’ from Siit Bay,” tipik sa pahimangno.

Samtang gipatuman ang pagdili sa kinhason, giklaro sa BFAR nga ang isda, nukos, alimango, ug pasayan luwas gihapon nga kan-on, "basta tangtangon ang tanang tinai ug hugasan pag-ayo sa nag-agas nga tubig sa dili pa kan-on."

Gipasalig usab sa BFAR 7 ang publiko nga nakigtambayayong kini sa mga local government units (LGUs) aron kanunay nga mamonitor ang lugar ug maminusan ang mga risgo. / CDF