Gitaho sa Bureau of Fisheries and Aquatic Resources sa Central Visayas (BFAR) 7 ang dakong pagsaka sa produksiyon sa pangisda sa unang quarter sa 2024.
Sumala sa Philippine Statistics Authority (PSA) (updated niadtong Mayo 8, 2024), ang kinatibuk-ang produksiyon sa pangisda sa Central Visayas niabot sa 18,242.08 metric tons (MT).
Kini nagtimaan sa 12.16 porsyento nga pagtaas kon itandi sa susama nga panahon sa 2023.
Ang Lalawigan sa Sugbo maoy nakatampo sa kinatas-ang volume nga 6,913.05 MT, nga mikabat sa 38 porsiyento sa kinatibuk-ang produksiyon.
Nagsunod ang Bohol nga adunay 6,603.66 MT (36%), Negros Oriental nga adunay 4,152.71 MT (23%), ug Siquijor nga adunay 572.66 MT (3%).
Ang commercial fisheries ug municipal fisheries sectors nakasinati og dakong pag-uswag ngadto sa 63.11 percent ug 13.63 percent, matag usa, itandi sa unang quarter sa 2023.
Bisan pa, ang sub-sektor sa aquaculture nakakita og pagkunhod sa 11.44 porsyento.
Ang nag-unang lima ka matang sa pangisda sumala sa gidaghanon sa produksyon sa unang quarter sa 2024 mao ang seaweeds (3,234.65 MT), big eye scad (1,467.73 MT), whiteleg shrimp o Penaeus vannamei (1,242.49 MT), round scad (1,177.53 MT), ug fimbriated sardines (831.64 MT). / KAL