BFAR: Pagdagsa sa mga isda sa Ginatilan di ikabalaka

Ginatilan Map
Ginatilan MapGoogle Map

Pipila ka mga gabii nga nangalingaw ang mga lumolupyo sa Poblacion, lungsod sa Ginatilan, habagatang ka­sadpang Sugbo sa pagdagsa sa mga isda nga Tuloy.

Nabantayan ang presensya sa mga isda sa Pebrero 11 ug nausban sa Pebrero 14, 2024 sa gabii.

Apan sa Pebrero 15 sa gabii, diin duna nay mga tawo gikan sa bukid ang nanag-atang, wa na mahibalik ang mga isda.

Ang mga tawo nga nagpaabot nagdala unta og mga balde.

Kini ang gi butyag ni Floramie Dacillo nga gika hinabi sa Superbalita Cebu kalabot sa talagsaon nga hitabo.

Usa ka video sa pagdagsa sa mga Tuloy nag-trending sa social media.

Nagkapuliki ang mga lumolupyo sa pagpamunit sa mga isda nga ilang gipangsulod og mga balde.

Si Dacillo niingon nga mas maayo nga masayod nga wa na mahibalik ang mga isda sa baybayon sa Poblacion aron di na mahago sa pag-atang.

Matod pa niya nga nagsugod ang pagdagsa sa mga isdang Tuloy sa baybayon sa Poblacion sa Pebrero 11 sa gabii ug nausban alas 6 sa gabii Pebrero 14, 2024.

Matod ni Dacillo nga nibati sila og kahadlok kon nganong nidagsa ang maong mga isda.

DI KAHADLUKAN

Apan ang tigpamaba sa Bureau of Fisheries and Aquatic Resources (BFAR 7) nga si Johann Tejada nga nahinabi sa mga tigbalita, nagkanayon nga di kini angay kahadlukan kay di kini tilimad-on sa usa ka katalagman.

Nahitabo kini tungod kay nanaghan na ang mga isda sa Tañon Straight nga nag-ilang sa mga isla sa Negros ug Sugbo tungod kay ang mao nga bahin sa kadagatan protected na.

Nagpasabot nga gidili na ang pagpangisda nga gamit ang baling kun pukot.

Tungod niini, nanaghan og maayo ang mga isda nga Tuloy, labina sa ilang pagpatuman sa pagsira sa fishing season sugod niadtong Nobiyembre 2023.

Luwas usab kaunon ang mao nga mga isda, nga giapod-apod sa mga lumolupyo nga nakakuha ngadto sa ilang kahigalaan ug kaparyentihan.

Gawas sa mga Tuloy, nakit-an usab ang baby sharks sa baybayon sa Brgy. Pasil, Santander, habagatang Sugbo.

Gituohan nga konektado ang hitabo sa pagdagsa sa mga isdang Tuloy sa Ginatilan.

Ang mao nga mga isda pagkaon usab sa mga shark.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph