Biado hari sa World 10-ball

DOMINANTE: Bisan pa siya ang nag-inusarang Pinoy, wa magpalupig si Carlo Biado ug gibulsa niini ang world 10-ball nga titulo. /
DOMINANTE: Bisan pa siya ang nag-inusarang Pinoy, wa magpalupig si Carlo Biado ug gibulsa niini ang world 10-ball nga titulo. / Hulagway gikan sa Predator Pro Billiard Series

Gilangkat ni Carlo Biado ang kampiyonato sa 2024 Predator WPA World 10 Ball Champion aron iisa ang bandera sa Pilipinas didto sa Rio All-Suites Hotel and Casino, Las Vegas, USA, Dominggo sa buntag, Marso 3, 2024 (PH time).

Naghawod si Biado sa cham­pionship match batok sa Japa­nese nga si Naoyuki Oi, 4-1, 3-4, 4-2, 4-1, sa ilang best-of-five duel.

Lakip sa dungog nga nakuha, gibulsa ni Biado ang $75,000 (P4.2 milyones) nga premyo alang sa kampiyon.

Nindot ang sugod ni Biado sa championship game ug miratsada dayon kini ngadto sa 4-1 sa first set.

Nakabalos ang Hapon sa ikaduhang set, 3-4, apan kalmado lang gihapon si Biado nga mi-capitalize sa mga sipyat ni Oi aron kuhaon ang ika­tulong set, 4-2, ug ang title clincher nga ikaupat nga set, 4-1.

Nakasulod sa finals si Biado human niya gipakamang ang Russian-born American nga si Fedor Gorst, 1-4, 4-3, 4-3, 4-2.

Si Oi, nga nakakuha og luna sa finals human gipilde si Denis Grabe nga taga Estonia sa Europa, di mouli nga maghilak kay aduna kini madawat nga $45,000 (P2.5 milyones) nga premyo isip runner-up.

Sa quarterfinals, gipilde ni Biado si Ko Ping-Chund, 4-1, 0-4, 4-1, 3-4, 4-1.

Samtang sa elimination round, gipangtumba ni Biado sila Justin Sajich sa Australia, top American player Shane Van Boening ug Lin Wu Kun sa Taiwan.

Nanuwa sa 2024 WPA Preda­tor 10-Ball Championship ang 64 ka best-ranked nga bilyarista sa kalibutan. Sa Biado maoy nag-inusarang player nga nagdala sa Pilipinas. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph