Human niya naangkon ang kampyunato sa bag-uhay lang nahuman nga 2025 World Pool 9-Ball Championship sa Jeddah, Saudi Arabia, dili lang dungog ang nakuha ni Filipino Carlo Biado, dako sab nga kantidad sa kuwarta.
Si Biado, kinsa nag-edad og 41, nakabulsa og $250,000 o kapin sa P14.3 million human sa kulbahinam niyang kadaugan batok ni Russian-American Fedor Gorst, 15-13, sa finals sa World Pool Championhip 9-Ball.
Sa kinatibuk-an, moabot na sa $259,750 o kapin sa P14.9 million ang nahipos sa gitawag og Black Tiger ning tuig 2025.
Niini, nipatong na sa No. 1 si Biado sa opisyal nga money maker nga listahan sa AZ Billiards ning Year of the Snake.
Si Gorst, kinsa nakadawat og $100,000 nga premyo isip 2nd placer sa WPC, nagsunod ni Biado sa lista nga adunay kinatibuk-ang $174,600 nga napupo.
Naa sa ikatulo mao si German Joshua Filler ($157,740), ikaupat si American Shane Van Boening ($91,700), ikalima si Albanian Kledio Kaci ($80,050) samtang ikaunom si Singaporean Aloysius Yapp.
Ang laing Pinoy nga si Roberto Gomez, kinsa nahimong 2nd placer sa 2007 WPC, naa sa ikapitong dapit nga adunay natigom nga $58,375.
Mokompleo sa Top 10 sa listahan mao sila si Estonian Denis Grabe ($57,575), Lithuanian Pijus Labutis ($55,950), ug Austrian Jasmin Ouschan ($55,490).
Si Biado napatik sa kasaysayan isip labing unang Pinoy nga nakalangkat sa WPC title sulod sa duha ka mga higayon. Labing una kini niyang naangkon niadtong 2017.
Gikan sa Jeddah, si Biado molarga paingon sa US aron mosalmot na sab og dagkong mga torneyo – ang Florida Open Pool Championship ug US Open.
Ang Florida Open Open, nga gikatakda karong Agusto 5-10, sa Orlando, Florida, adunay kinatibuk-ang ganti nga $200,000 diin P40,000 ang makuha sa kampyon.
Samtang ang US Open, nga gikatakda karong Agusto 18-23, sa Atlantic City, New Jersey, adunay kinatibuk-ang ganti $500,000 diin $100,000 ang mabulsa sa kampyon. / ESL