Nagubot og kadali ang dan Juana Osmeña sa Barangay Kamputhaw, dakbayan sa Sugbo diin matag gabii dunay magbarogbarog nga commercial sex workers, alas 5:00 sa buntag, Biyernes, Marso 8, 2024.
Kini tungod sa usa ka lalaki ang masuk-ano’ng nangita sa usa ka babaye nga iyang giabangan og P2,000 alang sa dinalian nga lawasno’ng kalipay apan gidaganan kini.
Sumala sa usa sa mga saksi nga hitabo ug nahinabi sa Superbalita Cebu nga dili lang magpahingan, ang lalaki nga kustomer taga Deca Homes, Barangay Ibabao, siyudad sa Mandaue, mikuha og babaye gikan sa maong dapit ug nagkasinabot nga moadto sa usa ka inn nga dili halayo sa dapit.
Matod pa, sulod sa lawak, ang lalaki naghubo dayon sa iyang karsones, apan ang babaye kalit lang nga nidagan padulong sa gawas.
Mao kini hinungdan nga nasuko ang maong lalaki ug maong nibalik kini sa dapit diin iyang gikuhaan sa maong babaye.
Apan ang niatubang kaniya mao ang 20 anyos nga giingong uyab sa babaye nga taga Barangay Kalunasan, dakbayan sa Sugbo nga sama sa nigawas nga bugaw usab.
Giingong nga ang maong uyab sa babaye nga mohatag ang kustomer nga lalaki sa dugang P1,000 aron mobalik na ang giabangan nga babaye.
Nisamot ang kasuko sa kustomer ug nahitabo ang rambol tali sa mga kauban sa lalaki ug mga buga hinungdan nga daling nanawag og polis ang mga establisamento sa maong dapit.
Naabtan pa sa mga polis ang duha nga nagsumbagay ug gipangdakop kini ug gisakay sa patrol car.
“Nibayad naman to ang lalaki nya kalit lang daw ni dagan ang babaye, wala pa maka ana-ana sila, mao to nianhi ang lalaki iyang na sumbagay ang uyab sa babaye,” matod sa saksi.
Gidala sa Abellana Police Station ang duha ka mga lalaki ug pulos gibalhog sa custodial facility .
Bisan nagkasinabot ang duha nga dili na magkasohay, apan, ang Abellana Police Station mokiha gyud og kasong alarm and scandal batok sa duha.
Samtang kadtong mga babaye nga magbarog-barog sa dalan panahon sa gabii hangtod sa kaadlawon, giimbitar sab sa kapulisan aron makuhaan og pamahayag labot sa maong insidente.