Biktima nakaangkon og 11 ka samad-pinusilan

SAMAD SA PAA: Ang igo sa paa sa mag-uuma nga usa sa 11 ka samad pinusilan nga naangkon human gipusil sa silingan gamit ang improvised shotgun sa Martes sa gabii, Marso 5, 2024, sa Brgy. Caridad, lungsod sa Tuburan. /
SAMAD SA PAA: Ang igo sa paa sa mag-uuma nga usa sa 11 ka samad pinusilan nga naangkon human gipusil sa silingan gamit ang improvised shotgun sa Martes sa gabii, Marso 5, 2024, sa Brgy. Caridad, lungsod sa Tuburan. / TAMPO

Usa ka mag-uuma nakaangkon og 11 ka mga samad pinusilan human gipusil gamit ang improvised shotgun alas 7:00 sa gabii sa Martes, Marso 5, 2024, sa Barangay Caridad, lungsod sa Tuburan.

Ang biktima giila nga si Antonio Lampago Agsoy, 46, ulitawo, lumolupyo sa naasoy nga dapit samtang ang suspek giila nga si Ryan Teñajora, hamtong, silingan sa biktima.

Sa follow up sa Superbalita Cebu sa Tuburan Municipal Police Station, nasuta pinaagi sa imbestigasyon ni Police Staff Master Sgt. Roberto Rondina ubos sa kamandoan ni Police Col. Narciso C. Abapo, nga ang biktima nga nagpakaon sa iyang iro sa gawas sa iyang balay dihang gipusil sa suspek.

Bisan nakabaton na siya’g mga samad pinusilan, nakamaniubra pa kini sa pagkamang ngadto sa kalibunan ug nakatago.

Gitabang siya sa iyang mga silingan, ang uban nanawag og rescue sa kapulisan.

Nasuta nga ang duha may bangi na daan ug kanunay nga may mainiton nga panaglalis.

Apan, atol ning pagsuwat, nagpadayon pa ang imbestigasyon ni Rondina.

Matod pa nga niadtong Marso 3, 2024, ang biktima nakaangkon og gisi sa iyang kilay human gibuno og bato sa suspek human sa ilang mainiton nga panaglalis ug gibaharan kini nga patyon.

Apan ang biktima wa magpa-blotter sa kapulisan sa maong insidente.

Hangtod ning pagsuwat, ang suspek wa pa makadakpi sa kapulisan. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph