Tungod kay gibana-banang 85 porsiyento sa mga piniriso ang nagpaabot pa sa ilang husay, naghuot na pag-ayo ang mga prisohan sa Central Visayas.
Sa pagkakaron, mokabat sa 15,859 ka mga detainee ang anaa sa mga pasilidad nga gidisenyo lamang unta alang sa 4,578 ka tawo, base sa datos sa Bureau of Jail Management and Penology (BJMP) niadtong Hulyo 31, 2025.
Ang kinatibuk-ang gidaghanon sa mga piniriso sa rehiyon anaa sa 15,919, nga maoy ikatulo nga kinadak-an sa tibuok nasod, sunod sa National Capital Region (23,084) ug Region IV-A o Calabarzon (19,222).
Sa tibuok Central Visayas, 13,479 niini ang mga wala pa mahukmi, samtang 2,440 ang mga konbiktado ug nagsilbi na sa ilang silot.
Gipakita sa datos nga ang mayoriya sa mga piniriso, sa Central Visayas man o sa tibuok nasod, sakop sa bracket sa mga edad nga makatrabaho pa.
Sa rehiyon, ang kinadak-ang grupo mao kadtong nag-edad og 36 ngadto sa 41 anyos (3,108 ka piniriso), gisundan sa 31 ngadto sa 35 (2,837) ug 25 ngadto sa 30 (2,740).
Ang nag-edad og 18 ngadto sa 24 moabot og 1,026, samtang 2,623 usab ang anaa sa edad nga 42 ngadto sa 47.
Duna usab mga edaran: 1,488 ang nag-edad og 48 ngadto sa 53; 731 ang nag-edad og 54 ngadto sa 59; 350 ang nag-edad og 60 ngadto sa 69; ug 80 ang sobra na sa 70 anyos. Wala’y natala nga piniriso nga ubos sa 18 anyos.
Sa tibuok Pilipinas, moabot sa 115,065 ka Persons Deprived of Liberty (PDL) ang anaa sa mga prisohan:
87.32% (100,476): Mga detainee (nagpaabot pa og husay).
12.68% (14,589): Mga konbiktado.
91.48% (105,264): Mga lalaki.
8.52% (9,801): Mga babaye.
Kadaghanan sa mga konbiktado sa nasod giisip nga city prisoners o kadtong nagsilbi og silot gikan sa usa ka adlaw hangtod sa tulo ka tuig.
Sa Central Visayas, susama ang dagan: 1,570 ang city prisoners, 575 ang provincial prisoners, 282 ang insular prisoners , nagsilbi og kapin sa tulo ka tuig hangtod lifetime, ug 13 ang municipal prisoners.
Usa ka dakong problema ang kahuot sa mga pasilidad.
Sumala sa sumbanan, ang matag piniriso kinahanglan duna’y 4.7 square meters nga luna, apan 337 sa 486 ka mga prisohan, 69.34% sa nasod ang sobra na sa kapasidad.
Sa Central Visayas, sobra og 11,281 ka piniriso ang sulod sa mga jail. Ang rehiyon maoy ikalima sa labing grabe og kahuot sa tibuok nasod, diin ang average nga congestion rate anaa sa 335 porsiyento.
Gani, duna’y natala sa rehiyon nga ang kahuot niabot gyud sa 1,705 porsiyento. / CDF