Karaang billboard sa sulod sa compound sa Saint Joseph Parish Church sa MJ. Cuenco Avenue ug Pope John Paul II Ave., Barangay Mabolo, Dakbayan sa Sugbo nahugno samtang gi-demolish pasado alas 10 sa Biyernes sa gabii, Pebrero 2, 2024.
Ang kontrata sa billboard giingong wala na i-renew sa kadagkuan sa parokya hinungdan nga gihinayhinayan kini og demolish pinaagi sa pag-anam anam og tangtang sa ibabaw nga gibana-bana nga dunay gitas-on nga 50 ka tiil.
Apan sa dihang nagpadayon ang pag cutting, ang mga angle bar kalit lang nahagsa paingon sa sidewalk sa habig sa MJ Cuenco Avenue. Maayo na lang nga wala malahos human ni masangit sa arko sa Cebu Magellan Lions Club.
Usa mga caretaker sa parking area sa simbahan nga dili lang magpaila, niingon nga matag gabii ang pag demolish sa billboard tungod kay maoy pagbuot sa simbahan aron dili makadisgrasya.
“Sa akong nahibaw-an wala na gi renew ang ilang contract mao to gi hatagan silag notice nga ipa demolish. Giingnan nana sila nga inanay lang ang pag guba kay basin makadisgrasya. Maayo walay naigo nga tawo,” matod sa caretaker sa interbyo sa Superbalita Cebu sa Sabado. / AYB