Samtang ang kadaghanan nipili sa hilom nga pagpahuway niadtong Mayo Uno, kami sa Barangay Inayawan, Cebu City nipalayo sa saba nga karsada ug sa nagpundok nga papeles sa opisina.
Gilayasan namo ang kadasig sa dakbayan aron sination ang kamalinawon sa palibot ug kabugnaw sa tubig nga nagtago sa habagatang tumoy sa Sugbo—ang Samboan.
Gipunit namo ang among mga backpack ug nideretso sa Lungsod sa Samboan aron pangitaon ang usa ka mutya nga giingong nitago sa kasingkasing sa lasang, ang Binalayan Hidden Falls.
Pag-abot namo sa Barangay Bonbon, gisugat kami sa presko nga huyuhoy sa hangin nga daw nanaghoy sa among kakapoy gikan sa siyudad.
Gibana-bana nga 15 ngadto sa 20 minutos ang pagbaktas aron makaabot sa busay.
Latas sa malunhaw nga kapatagan ug ilawom sa landong sa mga kakahoyan sa lubi, ang huni sa mga sapa-sapa nagsilbing “background music” sa among panaw.
Matag tunob sa yuta, nagkaduol kami sa hagubhob sa tubig nga daw nagtawag kanamo.
Dili malalis ang katahom sa Binalayan pag-abot namo sa mismong dapit.
Giila kini nga “Triple Drop Falls” tungod sa tulo ka tag-as ug tin-aw nga agos sa tubig nga dungan nga naghagbong gikan sa ibabaw.
Susama kini sa tulo ka puti nga ribbon nga nagdayandayan sa bungbong nga bato, usa ka talan-awon nga makapahunong sa imong gininhawa.
Apan dili lang ang busay ang bida. Sa ubos niini, nagpaabot ang gitawag nga “Gatorade Pool.”
Ang tubig asul kaayo, bugnaw, ug hilabihan katin-aw nga daw nagdapit kanimo sa pag-ubog dayon.
Alang sa mga isog nga nangita og adrenaline rush, ang Binalayan duna’y mga “jumping points” gikan sa tulo ngadto sa lima ka metros.
Aduna sab kini gagmay’ng langob sa luyo sa agos sa tubig nga mahimong suhiron alang sa mas lawom nga kasinatian.
Bisan pa man sa iyang global nga katahom, ang Binalayan nagpabilin nga “humble” ug barato. Ang entrance fee P150 apil na niini ang environmental fee ug gear rental, barato ra kaayo itandi sa kalipay nga imong makuha.
Apan ang tinuod nga kasing-kasing sa Binalayan mao ang ilang mga local guides. Dili lang sila bantay sa kaluwasan; sila ang mga batid nga photographers nga nasayod kon asa nga anggulo mogawas ang pang-Facebook o Instagram nga hulagway.
Ang among tulo ka adlaw nga pagpuyo Mayo 1 hangtod sa 3 nahimong mas espesyal tungod sa kamanggihatagon sa among Konsehal Emilio “Junior” Jaca ug sa iyang pamilya.
Ang iyang rest house nagsilbing among panimalay sa Samboan, diin ang panag-uban tali sa trabaho ug kalingawan maoy naghatag og bag-ong kadasig kanamo sa pagpangalagad sa Inayawan pagbalik namo sa siyudad.
Samtang naa na kamo sa Samboan, bisitaha sab ang Aguinid ug Dao Falls.
Sa tinuod lang, ang Binalayan usa ka kasinatian nga dili lang makita sa mata, kondili madala sa kasing-kasing hangtod sa hangtod. /