Daghan nako og mga kaila nga ni-invest ug nipalit nga way klaro. Anugon kay ang ending nangailad ra unya na-thank you ang puhonan kay wa gani ka gunit o kakita sa titulo.
Diay mga tip kon unsay angay buhaton kon mopalit og yuta.
Una, seguroa kon adunay tinuoray nga kopya sa titulo sa yuta ug kinsa kini nakapangalan. Kon ang tag-iya o real estate agent ang namaligya, i-check una kini sa Registry of Deeds para matino ug maklaro nga kining yutaa way encumbrances (pinireda, naay laing nanag-iyaa o naay laing nakapalit o uban pang kakulian o problema).
I-klaro gayod kon ang tanang mga impormasyon nga nakabutang sa titulo nag-match sa kopya ug records sa Registry of Deeds.
Sunod, kon matino na nga limpyo ang titulo unya insakto tanang entries, mag-hire dayon og Geodetic Engineer nga maoy mohimo og relocation survey sa boundaries sa yuta. Duna ni silay paagi nga pangitaon o mabutangan og muhon. Seguroa nga way kural o ubang structures nga nilapas sa yuta nga imong paliton.
Human, mahimo ka nang mo-execute og Deed of Sale o Contract of Sale. Ang namaligya ug ang mopalit mao ang magpinirmahanay unya seguroa nga ma-notaryuhan kini.
Isunod ang pagbayad sa Documentary Stamps. Aron di tantong momahal, bayri kini dayon human ma-notaryunan.
Sunod, bayran sa namaligya ang Capital Gains Tax didto sa Bureau of Internal Revenue (BIR) kay nakaginansiya man sila ini sa pagbaligya. Ang BIR moisyu dayon og “Certiicate of Authority to Register’. Kini mag-certificy sa tanang buhis mahitungod ining pagbaligya. Mag-authorize sab kini sa pag balhin sa titulo ngadto sa nakapalit.
Dad-on kining maong dokumento gikan sa BIR sa Registry of Deeds. Didto bayran ang transfer fees.
Ang Regisry of Deeds mo surrender sa Owner’s Copy sa titulo apan kinahanglang mo mohuwat unya sigehan og follow-up hangtod nga mahuman ang proseso kay medyo diri mataudtauran, ang uban molungtad og usa ka tuig.
Nanghinaot ko nga kining lindog nakatabang og gamay pagpasabot.