Sa ka mahal sa mga palaliton karong panahuna, ang magti-ayon way choice kundi magtambayayong sa trabahoon sa balay ug pangita og panginabuhi aron makalahutay unya hapsay ang pagpuyo.
Akong itampo akong kaugalingong mga kasinatian kung unsaon nga makatigom bisag ginagmay basta kanunay.
Pinaka -una ang pagluto og pagkaon para sa banay ug para ibalon sa tunghaan ug eskwelahan. Gawas nga presko ug limpyo, makaseguro ka pa nga makabarato kaysa mopalit ug luto-daan nga kasagaran dunay mga sagol nga pampagana, palami ug mga preservatives nga di maayo sa atong panlawas.
Kung mopalit og tambal, pilia ang generic nga brand kay sa tinuod lang ang nakapamahal sa tambal ang iya mang pangalan o brand name. Ipasuwat sa resita ang generic name kay parehas ra ni og bisa.
Ang mga appliances sab sa balay kung wa gamita, i-unplug para way kuryenting makalusot. Aning pa-agiha maka save ka gamay sa imong bayad sa kuryente.
Una ma-abot imong sweldo, paghimo daan og budget kung pila igahin para sa pagkaon, groceries, abangan sa balay, bayad sa utilities ( tubig ug kuryente) plete, tuition ug uban pang gastuhan sa mga bata, emergency o contingency funds. Labing maayo kung duna kay igahin para savings.
Kung duna kay sobrang mga gamit, furniture o appliances sa balay nga wa agamit o wa kinahanglana, mahimo sab kini nimong ibaligya total subra o wa naman sab nay gamit nimo. Kusog kining mahalin kung imong i-post for sale sa mga social media o internet market.
Ilista tanan nimong utang unya paninguhaa nga imo kining mahinay-hinayan og bayad bahalag ginagmay hangtod ma-impas aron sab pa-utangon ka og balik.
Ayaw sab pa tintal anang ilang giingon nga impulse buying. Imong paliton bisag wa ka magkinahanglan tungod kay na ingganyo ka sa propaganda.
Pag-atang og dunay mga sale kay seguradong makabarato ka labi na ang buy one take one.
Kanang mga panginahanglanon nga gamiton kada adlaw mas maayong mopalit in bulk (dinaghan nga tinigob) sama sa bugas basta dugay lang madaot.