Binghay: Baliki ug pasalamati

Binghay.
Binghay.File photo

Apas sumpay sa akong lindog sa mi-aging Sabado, akong pun-an paghisgot ang mga maanindot nga Golden Rule nga nindot sugdan pagsugat sa Bag-ong Tuig.

Una, ayaw patuga-tuga og hatag sa imong opinion ug huna-huna sa mga isyo nga wa kay kalibutan o kahibalo kay imbis makahatag og katin-awan, makapasamot na hinuon sa kalibog sa uban.

Sunod ayaw pautang sa tawo’ng kahibalo ka nga di kabalo mobayad unya kon mohatag ka man ugali, huna-hunaa na lang kini nga usa ka buhat sa kaluoy unya ayaw na pag-expect nga mabayran.

Kon naa kay makita nga ma­ayo’ng binuhatan sa uban, a­yaw pagmakuli paghatag og pagdayeg sa ilang maayong nahimo.

Way kumo ang pagpaubos ug pagpalayo sa mga garabon. Huwata nga ang ubang mga tawo maoy mohatag nimo og pagdayeg. Ayaw alsaha ang imong kaugalingong bangko (pagpanghambog) para lang mapansin ka sa uban. Ang tinuoray nga utukan ug maayo og kahimtang di manghinambog sa ilang talent ug kabtangan.

Ayaw kalimot kon diin ka gikan, bisag unsa pa ka taas sa imong naabot. Baliki ug pasalamati ang mga tawo nga dako og natabang nimo labi na kadtong mga panahon nga nagkalisod ka.

Kon naay mohangyo nimo sa pagtago og sekrito labi na og sen­sitibo, ayaw kini iyagyag ug ipanabi diha sa pubiko. Mas mosalig ang imong higala sa sunod kon makatago ka og sekrito.

Pangita og panahon nga makatawag o mobisita ka sa imong mga paryente o higala.

Normal ra ang panagsa nga masayop. Kon kini mahitabo, ayaw pagmahay hinuon himua kini’ng leksyon aron mas molambo ka.

Inig bangon sa buntag human magpasalamat og pangadye, ayaw og kalimot pagtipig sa imong gihigdaan una ka magsugod sa imong inadlaw-adlaw nga tulumanon.

Pangitai og panahon ang pa­ra sa kaugalingon pagbuhat sa mga gusto nimong buhaton.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph