Ang tibuok kalibotan ugma magsaulog sa Mother’s Day nga ang tumong paghatag og pahalipay ug pasidungog sa tanang nanay sa ilang mga sakripisyo ug kahago pagpadako ug pagmatuto nato.
Nagsugod ang pag-saulog sa Mother’s Day niadtong mga 1900’s resulta sa kampanya ni Anna Jarvis Reeves nga taga Estados Unidos, paghatag og pasidungog sa tanang mga sakripisyo nga nahimo sa iyang inahan para nilang manag-gsuon una kini namatay.
Sukad adto nahimo nang kustombre sa lainlaing mga nasod ang paghatag og importansiya sa mga inahan kada ikaduhang Dominggo sa buwan sa Mayo.
Unsa may kasagarang gusto sa mga nanay?
Basi sa akong panikay-sikay, simpli, way gasto ug di mapalit ang kasagarang gusto sa mga nanay sama sa panahon nga makapahuway sila sa ilang mga inadlaw-adlaw nga gimbuhataon ug kabilinggan, makatulog nga way makatukaw, makadawat og kinasingkasing (labi na og original nga hinimo) nga mga cards, scrap book, poem, suwat, photot album ug uban pa.
Hinumdumi nga ang imong mama maoy star o rayna sa inyong panimalay ugma.
Kon mahimo ayaw siya patrabahoa sa iyang naandang buluhaton. Kamo mismo’ng mga anak maoy mohimo ini sama sa pagluto sa iyang mga paboritong pagkaon, labi na adtong recipe nga pinasa gikan pa sa katigulangan o ba kaha surprisaha og breakfast in bed.
Pwede sab magpahigayon og home SPA. Ang mismo’ng mga anak magturno-turno og atiman-pagwapa sa ilang mama gikan sa paghilot, manicure, pedicure o hot oil sa buhok.
Kon dunay hinipusan sa allowance o sweldo, mahimo sang dad-on siya sa mga lugar nga iyang hilig sama sa garden shop, paborito niyang restaurant. Kon hilig og basa, adto sa bookstore o mag hiking,shopping, swimming ug uban pa.
Kadtong hinan-aw og salida, pwede sab mag movie marathon sa iyang mga paboritong sine, pakapinan sa iyang paboritong snacks o popcorn samtang nagtan-aw sa salida.
Di na kinahanglan pang mogasto og dako para lang makapahalipay sa mama kay mismo imong presensiya ug pagkatawo para niya pinakabililhong gasa naman.