Ang pagpanganak sayon ra apan ang pagpadaku og matuto sa bata maoy labihang lisura.
Kasagaran di lang ang kinaiya o batasan sa bata kundi apil kon giunsa nato sila pagdiplina o pagpadaku.
Kining mosunod maoy mga kumon nga simtomas sa bati, sayop o toxic nga dinad-an pagpadako sa mga bata:
Pinaka-una ang pagtandi sa bata ngadto sa uban (ma igsuon, silingan, paryente o klasmet) . Ang akto sa pagtandi makapasinati sa bata og ka insecure, kakuwang sa iyang kahanas unya mosamot ka ubos ang iyang pagtan-aw sa kaugalingon.
Sunod kining pagsilot, pangasaba o panagmal sa bata atubangan sa daghang tawo nga nahulog na og pakauwaw. Importante ang pagdisiplina apan kon buhaton kini sa publiko, makapasamot kini sa ka uwaw sa bata unya mawad-an na sab hinuon kini og pagsalig ug kompiyansa sa kaugalingon.
Ikatulo ang subrang pagpahamtang og silot nga di na makatarunganon sama sa pagbuwad sa init sa adlaw, kulata, di pakan-on ug uban pa. Kini makadaut sa emosyon ug huna-huna sa bata nga posibling mopaingon sa tumang kahadlok, o ba kaha di na mag-apil-apil sa mga kalihukan.
Ika-upat ang pagsilot sa bata bisag misulti kini sa tinuod. Imbis silutan, angay hinuong daygon ang bata nga siya wa mamakak.
Ikalima ang paghatag og bating ehemplo. Ang utok sa mga bata dali rang makasuon sa mga naandang ginbuhaton ug kinaiya sa mga dagko nga nagpalibot niya. Angay panaminan ang atong mga aksyon kay sa mata sa bata ang gipanghimo sa matanda ay tama.
Ika-unom ang pagrespito ug sabot sa ilang mga huna-huna, pulong ug pagbati. Kon imo kanunay pakgangon o ipadaplin ilang isulti o suhistiyon, bation kini nila nga wa silay balor ug labot.
Pagpanaway sa dinad-an sa pares (mama o papa) atubangan sa bata. Ang bata nga nagtan-aw mosamot kalibog unya makat-on na hinuon og pamili o paglaban.
Katapusan ang subrang pagpangga. Ang pagdayeg maayo apan kon kini masubrahan posibling maarogante o ma demanding na hinuon ang bata unya di na manglimbasog.