Binghay: Ikabalaka nga kolor sa ihi?

Bag-o lang gyod ko nahibalo nga duna diay pasabot ang kolor sa ihi. Og wa masakit akong kauban sa trabaho, di sab ko maengganyo og susi-susi kay nagtuo ko nga tanang ihi parehas ra may kolor o tin-aw.

Matod ni Dr. Bilal Kaaki sa Unity Point Health, ang color sa ihi makasulti sa estado ug kahimtang sa lawas. Mahimo kining lasaw nga yellow o maypagka pula-pula, pink, orange o green. Ang atong gipangkaon, mga tambal nga gipang-inum o gipamating sakit -sakit sa lawas makapa-usab sa kolor sa ihi.

Kung himsog ang tagtu-ngod ang normal nga kolor sa ihi maypagka lasaw nga dilaw (pale yellow). Kung lugom o espiso na gali ang pagka dilaw, pasabot nga dehydrated kon nagkuwang sa tubig ang lawas. Kining pigment nga gitawag og urochrome o urobilin maoy maka-ingon sa dilaw nga kolor.

Kining mosunod maoy pasabot sa kolor sa ihi:

Light Brown (murag kolor sa tsa), ang pasabot, posibling naay problema sa kidney. Ang masubrahan sa   pag-ehersisyo mao sab kini maka-ingon sa kondisyon nga rhabdomyolysis nga maoy mopagawas sa kolor nga light brown.

Kung pula o pink gali ang ihi, posibli nga nakuha kini sa mga pagkaon sama sa beets o berries usahay bisag hipon nga naay pink nga koloring maoy maka pa pula o pink sa ihi. Apan pagbantay kay kung duyugan kini og sakit sa pagpangihi, pa konsulta gilayon sa mananambal kay posibling dunay urinary tract infection, bato sa kidney o cancer.

Sunod ang asul (blue) o berde (green) nga ihi. Kasagarang makapa-usab sa kolor nga ingon ini ang food coloring apan ang Bitamina B makapa green sab sa kolor sa ihi. Ang tambal sa depression sama sa amitriptyline, propofol (anesthesia kung operahan) og indomethacin (pain reliver) makapa-asul o berde sab sa kolor sa ihi.

Orange nga ihi. Ang Bitamina C ug carotene sa carrots maka pa orange sab sa ihi apil ang mga antibioltics para tambal sa tuberculosis nga gitawag og Rifampicin. Angay sab bantayan kining kolora kay sinyales kini nga dunay deprensiya o sakit ang atay.