Binghay: Junior citizen

Binghay.
Binghay.File photo

Duha ka tulog na lang junior citizen nako, manghod gamay sa senior citizen, ma­ong kining lindog bahin sa angay andamon o buhaton pagsugat sa adlawng’ natawhan.

Lainlaing suhistiyon ang akong nadawat gikan sa mga higala nga nag-una sa duyan. Dunay mitambag nga ‘enjoy life’. Hinayhinayon paggamit ang hinaguang tinigom para malingaw. Gamiton ang hini­pusan samtang bata-bata pa.

Suroy sa mga lugar nga imong gustong maabot, palita imong mga paboritong pagkaon, bu­tang o gamit kay di biya ni nimo madala sa kamatayon.

Ayaw ka konsensiya pagga­mit sa imong hinaguan. Hinumdumi pipila ka tuig ka nga naghago, nag-atiman ug nagmatuto sa mga anak ug apo para mapadako sila nga tarong.

Imong gipaeskwela, gipakaon, gihatagan og komportab­ling pinuy-anan ug way puas nga suporta sa ilang panginahanglan. Karon, ila nang turno ug responsibilidad ang pagpangita og panginabuhi para sa ilang pamilya.

Di na angay daginuton o ka-stress ang mga gagmay’ng butang. Tinuod duna tay daghang maayo o bati nga ka­sinatiang miagi apan karon ang importante.

Kung mahimo, likayi ang pangipon sa mga anak para magpabilin imong privacy sa kaugalingon unya sila sab sa ilang tagsa-tagsa ka pamilya. Buhata lang kini kung ma lonely ka o di ka gustong mag-inusara.

Paningkamoti paglikay ang pagsegi og panaway ug reklamo gawas kung gikinahanglan gyod nimo. Hinay-hinaya pagdawat ang mga sitwasyon nga wa kay mahimo kay di nimo kontrolado.

Ipadayon imong naandang mga hobbies (cooking, reading, writing, dancing, travelling).

Aron di tantong mag-mingaw, mahimong mag-sagop og iro o iring ba kaha. Maayo sang magsugod og mga ginagmay nga mga proyekto sama sa gardeninig,

Respituhi ang mga huna-huna o opinyon sa mga batan-on bisag lain-lain mo og idea. Paghatag og tambag o giya apan ayaw ipamugos, pagbuot o panaway.

Katapusan, ayaw kalimot sa pagkatawa. Pahinumdumi kanunay imong kaugalingon sa mga grasyang nadawat nga di na maihap.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph