WAY kaminyuo'ng perpekto. Bisag unsa pa ka grande ang kasal, dunay uban molahutay apan duna say uban nga magkabuwag.
Kining akong lindog magtuki sa stages sa kaminyuon.
Stage 1: Fantasy Time/Honeymoon Stage (1-3 ka tuig nga minyo). Ining panahuna ang pagtan-aw sa imong pares puro nindot unya iyang mga sayop, para nimo ‘cute’ ra kini og di makalagot. Wa kaayo'y away nga mahitabo.
Stage 2: Compromise (2-7 ka tuig), maghinay hinay na og sugod ang pagkadismaya sa usag-usa. Dinhi na maka-amgo sa tinuoray nga batasan o kina-iya. Mao ni ang kuyaw-kuyaw nga panahon kay ang uban nga di maka agwanta delikadong magkabuwag. Mao sab ning panahuna nga magsugod ang negosasyon nga ang tumong pagdani sa pares sa mga panaad nga mag-usab para magkabalik ang buot.
Stage 3- Reality Struggles (5-10 ka tuig). Mao ning panahuna nga maka-amgo ang usag-usa nga bisag dunay katumanan sa mga pagsalig sa kausaban, kamong duha di na gyod mausab. Imo nang pugson imong kaugalingon pagsabot nga ikaw ug ang imong pares angay modawat sa inyong mga limitasyon.
Stage 4: Decisions (10-15 ka tuig). Mao na ning panahuna nga dawaton na sa magti-ayon ang mga kamatuoran nga ang bati nga mga kina-iya ug batasan di na mapapas maong dawaton na lang og ipadaplin. Ipalabi hinuon ang mga maanindot niyang gawi. Nadawat na sa usag-usa ang iyang pagkatawo.
Stage 5: Separation (12-17 ka tuig): Kung di gihapon kadawat unya di ka agwanta sa pares dunay dakong purohan nga magpalayo ang magti-ayon sa usag-usa ( buwag og higdaanan, kaon, kalihukan) apan nagpuyo ra gihapon sa usa ka balay.
Stage 6: Together Again (17-20 ka tuig). Ang magti-ayon maka-amgo nga bisag duna silay mga kakulian ug di pagkasinabot pero gusto gihapon nilang duha mag-ipon isip magti-ayon. Di na sab ning duha maghuna-huna sa posibilidad nga magbuwag.
Stage 7: New Freedom (subra 20 ka tuig). Mao ni pinaka best years sa kaminyuon kay komportable na ang magti-ayon sa ilang emosyunal nga lifestyle.