Ang buhok nabantog na sa makadaghang mga higayon nga korona sa kaanyag, ma babaye o lalaki, maong atong hisgutan karong adlawa ang mga nakaingon sa pagnipis, unsay angay itambal o angay buhaton para matabang pa kini.
Kon imong mapanid-an nga nagka-anam na og panlagas imong buhok nga imong makita sa imong gitindugan labi na inig kaligo, human manudlay o ba kaha buhok nga nahabilin sa unlan/gikatulgan, makita na sab ang puting bagolbagol, o ba kaha nangaputol unya nagka anam kamubo o ka nipis kon mag ponytail, kini nagpasabot nga angay ka nang mangunsulta og mananambal sama sa dermatologist para matino kon unsay naka-ingon unya maagapan og insakto.
Matod sa Cleveland Clinic, kasagarang makasinati ini kababayen-an nga dunay kakuwangan sa bitamina, nagpangidaron og 40 anyos pataas o nag-menopause na unya nag hormonal imbalance, dunay kaliwat nga mga nipis og buhok (genes), kadtong bag-ong nanganak unya niubos ang timbang o ba kaha anemic. Ang uban sab naapektuhan sa mga isog nga tambal sa ilang chemotherapy, operasyon o radiation. Ang tumang physical o emotional stress (sama pananglit kon mamatyan unya naglisod og dawat) makapanipis sab sa buhok.
Ang uban sab ni nipis ang buhok tungod sa ilang abnormal nga thyroid. Ang kadtong nagsegi og pakulong, pa color o pa straight sa buhok gamit ang mga isog nga chemicals maka daot o patay sab sa buhok labi na sa may gamot nga bahin.
Ang kanunay sab nga paghikot sa buhok gamit ang lastiko para ponytail o salapid maka-ingon sab sa pagnipis.
Unsa may tambal o angay buhaton para matabang pa kini?
Kasagarang mananambal mo prescribe og supplements/ vitamins sama sa mga multi-vitamin o biotin o Minoxidil (Rogaine) apan mas maayong mangunsulta una sa doktor una moinom o gamit ini para mahibaw-an ang gidaghanon o ka pila gamiton. Ang doktor mismo maoy mogiya kon unsang klasing tambal gamiton.
Sa kadtong maka-afford, mahimo sab silang magpa hair transplant, injection og protein-rich nga plasma (PRP) ug microneedling.